मुंबई : पुणे जिल्ह्यातील चाकण या प्रमुख औद्योगिक क्षेत्रासाठी १४०० कोटी रुपयांच्या एकात्मिक पायाभूत सुविधा विकास आराखड्यास आणि हिंजवडीतील वाहतूक कोंडी सोडवण्यासाठी ४२६.५४ कोटी रुपयांच्या स्वतंत्र योजनेस महाराष्ट्राचे मुख्यमंत्री देवेंद्र फडणवीस यांनी तत्त्वत: मान्यता दिली आहे.
या योजनेअंतर्गत रस्ते सुधारणा, वाहतूक व्यवस्थापन, पर्जन्य जलवाहिनी (ड्रेनेज) आणि नागरी सुविधांच्या सक्षमीकरणावर भर दिला जाणार आहे. हे प्रकल्प डिसेंबरपासून सुरू होणार असून, आगामी पावसाळ्यापूर्वी चाकणमधील वाहतूक आणि ड्रेनेज व्यवस्थेत मोठी सुधारणा करण्याचे उद्दिष्ट ठेवण्यात आले आहे.
मुंबईत झालेल्या बैठकीत एमआयडीसी, पीएमआरडीए, सार्वजनिक बांधकाम विभाग आणि जिल्हा परिषद यांसारख्या विविध संस्थांना आपापसांत समन्वय राखून काम करण्याचे निर्देश मुख्यमंत्र्यांनी दिले. सुमारे ७८ किमी नैसर्गिक नाल्यांवरील अतिक्रमणांमुळे होणाऱ्या तुंबलेल्या पाण्याची समस्या सोडवण्यासाठी मोहीम हाती घेण्यात आली.