महाराष्ट्रातील सर्वात मोठ्या स्मशानभूमींपैकी एक असणाऱ्या पुण्यातील वैकुंठधाम स्मशानभूमीत गॅस दाहिन्यांवर आधारित अंत्यसंस्कार सेवा तात्पुरती बंद करण्यात आली आहे. एलपीजी (लिक्विफाइड पेट्रोलियम गॅस)च्या तीव्र टंचाईमुळे हा निर्णय घेण्यात आला असून, पुढील आदेश येईपर्यंत गॅस दाहिन्यांचा वापर थांबवण्यात आला आहे.

पुणे महानगरपालिकेचे कार्यकारी अभियंता निलेश कालेकर यांनी दिलेल्या माहितीनुसार, स्मशानभूमीत उरलेला एलपीजी साठा केवळ दोन अंत्यसंस्कारांसाठी पुरेसा आहे. एका अंत्यसंस्कारासाठी साधारणपणे १८ किलो एलपीजी लागतो. सुमारे १७ एकर क्षेत्रावर पसरलेल्या वैकुंठधाम स्मशानभूमीत दररोज सरासरी २० अंत्यसंस्कार केले जातात.

सध्या विद्युत दाहिन्यांद्वारे अंत्यसंस्कार

एलपीजीच्या कमतरतेमुळे सध्या सर्व अंत्यसंस्कार विद्युत दाहिन्या तसेच एपीसी (Air Pollution Control) प्रणालीवर आधारित भट्ट्यांद्वारे करण्यात येत आहेत. पुणे महानगरपालिकेने नागरिकांना सूचना देत गॅस दाहिन्या तात्पुरत्या बंद असल्याचे स्पष्ट केले आहे.

एलपीजी तुटवड्याचे कारण काय?

५ मार्च रोजी केंद्रीय पेट्रोलियम व नैसर्गिक वायू मंत्रालयाने जारी केलेल्या निर्देशांनुसार, उपलब्ध प्रोपेन आणि ब्यूटेनचा वापर प्रामुख्याने घरगुती एलपीजी पुरवठ्यासाठी करण्याचे आदेश देण्यात आले आहेत. मध्यपूर्वेतील तणावामुळे इंधन आयातीवर परिणाम होऊ नये आणि घरगुती ग्राहकांना अडचण येऊ नये, यासाठी हा निर्णय घेण्यात आला आहे.

अंत्यसंस्कार प्रक्रियेत अडथळा नाही

पुणे महानगरपालिकेच्या अधिकाऱ्यांनी सांगितले की, वैकुंठधाममधील पाच विद्युत दाहिन्या तसेच लाकडाच्या साहाय्याने केले जाणारे अंत्यसंस्कार पूर्णपणे सुरु आहेत. यासाठी वायूप्रदूषण नियंत्रण यंत्रणाही बसवण्यात आली आहे. त्यामुळे नागरिकांच्या अंत्यसंस्कार प्रक्रियेत कोणताही अडथळा येणार नाही.

निलेश कालेकर यांनी सांगितले की, एलपीजी तुटवड्याच्या पार्श्वभूमीवर अंत्यसंस्कार सेवा सुरळीत ठेवण्यासाठी विद्युत दाहिन्यांचा तात्पुरता पर्याय वापरला जात आहे.

सरकारकडून दिलासा

दरम्यान, पेट्रोलियम आणि नैसर्गिक वायू मंत्री हरदीप सिंग पुरी यांनी देशातील घरगुती एलपीजी पुरवठा स्थिर असल्याचे सांगत नागरिकांना दिलासा दिला आहे. भारताकडे पुरेसा ऊर्जा साठा असल्याचेही त्यांनी स्पष्ट केले.

इंडियन ऑइल कॉर्पोरेशननेही इंधन वितरण व्यवस्था सुरळीत सुरु असल्याचे सांगत नागरिकांना घाबरून अनावश्यक खरेदी टाळण्याचे आवाहन केले आहे.

एलपीजी पुरवठ्याची परिस्थिती स्थिर होईपर्यंत वैकुंठधाममधील गॅस दाहिन्यांवर आधारित अंत्यसंस्कार तात्पुरते बंद राहणार असून, पुरवठा पूर्ववत झाल्यानंतर ही सेवा पुन्हा सुरु केली जाईल, असे प्रशासनाने स्पष्ट केले आहे.