कोल्हापूर : सरकारने मराठा समाजाला आरक्षण दिले नाही, तर विधानसभेत २८८ उमेदवार उतरवण्याचा निर्णय २९ ऑगस्टला जाहीर करणार, असे मराठा समाजाचे नेते मनोज जरांगे पाटील यांनी जाहीर केले आहे. त्यामुळे जरांगे यांनी विधानसभेच्या रिंगणात उडी घेतल्यास, त्यांच्यासोबत तिसरी आघाडी करण्यासाठी माजी खासदार संभाजीराजे छत्रपती यांनी फिल्डिंग लावली आहे. यासंदर्भात लवकरच मनोज जरांगे पाटील यांच्यासोबत बोलणी करणार असल्याचेही संभाजीराजेंनी सांगितले.

समाजामध्ये काम करत असताना जरांगे पाटील यांचे उद्दिष्ट आणि माझा उद्देश एकच आहे. त्यामुळे आम्ही एकत्र येऊन काम करणार आहोत, असा विश्वास त्यांनी व्यक्त केला. विधानसभा निवडणूक एकत्र लढवण्याबाबत आपली आणि मनोज जरांगे पाटील यांची अद्याप चर्चा झालेली नाही. मात्र, यासंदर्भात आपण लवकरच चर्चा करू, असेही ते म्हणाले. मराठा समाजाला ओबीसींमधून आरक्षण दिले नाही तर राज्यातील २८८ विधानसभा मतदारसंघात उमेदवार देणार असल्याचा इशारा मनोज जरांगे पाटील यांनी सरकारला दिला आहे.