सांगली : सांगली महापालिका निवडणुकीच्या पार्श्वभूमीवर सांगली पोलिसांनी हद्दपारीची मोठी कारवाई केली आहे. अजित पवार यांच्या राष्ट्रवादीचे प्रभाग क्रमांक ६ मधील सर्वसाधारण गटातील उमेदवार आझम काझीवर हद्दपारीची कारवाई करण्यात आली. तसेच आझम काझीसह जिल्ह्यातील वेगवेगळ्या ठिकाणच्या टोळीतील आठ जणांवर हद्दपारीची कारवाई झाली.
या सर्वांना सांगली आणि कोल्हापूर जिल्ह्यातून एक वर्षासाठी हद्दपार करण्यात आले आहे. शुक्रवारी ९ जानेवारी रोजी मिरजमध्ये अजित पवार यांची सभा होत असताना या कारवाईमुळे राजकीय वर्तुळात चर्चा सुरू झाली आहे. गुन्हेगारी पार्श्वभूमीचे उमेदवार दिल्याने भाजप आणि अजित पवार यांच्या राष्ट्रवादीमध्ये एकमेकावर गेल्या काही दिवसांपासून जोरदार टीका होत होती.
कारवाईमुळे जिल्ह्यात खळबळ
कुपवाड पोलीस ठाण्याच्या हद्दीतील चारजण, आटपाडी पोलीस ठाण्याच्या हद्दीतील तीन, विटा पोलीस ठाण्याच्या हद्दीतील दोघावर हद्दपारीची कारवाई करण्यात आली आहे. पोलीस अधीक्षक संदीप घुगे यांनी हे आदेश दिले आहेत. ऐन निवडणुकीत झालेल्या या कारवाईमुळे जिल्ह्यातील राजकीय वर्तुळात खळबळ उडाली आहे. पालिका निवडणूक तसेच आगामी निवडणुकांच्या पार्श्वभूमीवर ही कारवाई करण्यात आली आहे.