पुणे : शेतकऱ्यांचे उत्पन्न दुप्पट करण्याचे आश्वासन केंद्र सरकार पूर्ण करू शकलेले नाही. त्यामुळे सत्ताधाऱ्यांना शेतकऱ्यांची पर्वा नाही हेच दिसून येते, असा आरोप राष्ट्रवादी काँग्रेसच्या शरद पवार गटाचे नेते शरद पवार यांनी शनिवारी केला. संजय राऊत, बाळासाहेब थोरात आणि सुप्रिया सुळे या महाविकास आघाडीच्या नेत्यांच्या उपस्थितीत पुणे जिल्ह्यातील इंदापूर येथे शेतकरी मेळाव्यात ते बोलत होते.
देशात आता परिस्थिती वेगळी आहे. आगामी लोकसभा निवडणुका अतिशय महत्त्वाच्या आहेत. पंतप्रधानांनी शेतकऱ्यांचे उत्पन्न दुप्पट करण्याचे आश्वासन दिले होते, पण तसे झाले नाही. देशातील शेतकऱ्यांनी कांद्यावर सवलत देण्याची मागणी केली आहे. मात्र, सत्तेत असलेल्यांना शेतकऱ्यांची काळजी नाही, असे पवार म्हणाले. सरकारच्या विरोधात बोलल्यानंतर २०२२ मध्ये शिवसेना (उबाठा) नेते राऊत यांना तुरुंगात टाकण्यात आले. आता अरविंद केजरीवाल यांना तुरुंगात पाठवण्यात आले आहे, याकडेही पवार यांनी लक्ष वेधले.
या मेळाव्यात ठाकरे गटाचे नेते संजय राऊत यांनी भाजपप्रणीत केंद्र आणि राज्य सरकारवरही निशाणा साधला. आम्हाला तुमचे 'अच्छे दिन' नको आहेत. आम्हाला २०१४ पूर्वीचे दिवस द्या. अजित पवार यांच्या आघाडीत सहभागी झाल्यानंतर आमच्यावर कोणताही परिणाम झाला नाही. एकनाथ शिंदे आम्हाला सोडून गेल्यानंतर आमचा पक्ष अधिक मजबूत झाला आहे. आम्हाला धमकावू नका. आम्ही कशालाही घाबरणार नाही. येत्या चार महिन्यांत देशात सरकार बदलताना दिसेल. आमचे सरकार स्थापन झाले की तुमच्या पक्षात कोणीही उरणार नाही, असे राऊत म्हणाले.