शिर्डी : शिर्डीत साईबाबांचा मोठा उत्सव साजरा होतो. या उत्सवाला राज्यासह देशाच्या विविध भागातून मोठ्या संख्येने भाविक साईबाबांचे दर्शन घेण्यासाठी येत असतात. या भाविकांना यंदाच्या गुरुपौर्णिमा उत्सवात साईंच्या चरणी मोठ्या प्रमाणात गुरुदक्षिणा जमा झाली आहे. गेल्या तीन दिवसात मंदिर समितीकडे ६ कोटी ३१ लाखांहून अधिक दान आले आहे. गुरुपौर्णिमा उत्सवाच्या कालावधीत गेल्या तीन दिवसात साईंच्या चरणी भाविकांनी, भक्तांनी भरभरून दान दिले आहे. . दक्षिणा पेटी, देणगी काऊंटर, सशुल्क पास, डेबिट-क्रेटीट कार्ड, ऑनलाईन देणगी, मनी ऑर्डरच्या माध्यमातून हे दान साई चरणी जमा करण्यात आलं आहे. येथील देणगी काऊंटरवर १ कोटी १७ लाख ८४ हजार रुपये, तर सशुल्क पास देणगीतून ५५ लाख ८८ हजार २०० रुपये मिळाले.