मुंबई : शिवसेना (उबाठा) व शिवसेना (शिंदे गट) यांचे दसरा मेळावे उद्या आयोजित केले आहेत. शिवतीर्थावर शिवसेनेचा (उबाठा) मेळावा होणार आहे. तर शिंदे सेनेचा मेळावा नेस्को, गोरेगाव येथे आयोजित केला आहे. मनपा निवडणुकांच्या पार्श्वभूमीवर दोन्ही शिवसेनेचे नेते काय बोलतात? याकडे सर्वांचे लक्ष लागले आहे.
शिवसेनेचा (उबाठा) दसरा मेळावा उद्या दादर येथील शिवतीर्थावर होत आहे. या मेळाव्यात शिवसेना पक्षप्रमुख उद्धव ठाकरे यांचा आवाज घुमणार असून ते शिवसैनिकांना कोणता विचार देतात आणि अतिवृष्टीसह विविध प्रश्नांवरून राज्यकर्त्यांवर कसा आसुड ओढतात, याकडे सर्वांचे लक्ष लागले आहे.
शिवसेना फुटीनंतर उद्धव ठाकरे यांची शिवसेना आणि एकनाथ शिंदे यांची शिवसेना दसरा मेळाव्याच्या निमित्ताने पुन्हा एकदा आमने-सामने उभे ठाकले आहेत. २०२२ मध्ये एकनाथ शिंदे यांच्या बंडानंतर शिवसेनेत दोन गट पडले आणि मुंबईत दोन वेगवेगळे दसरा मेळावे होऊ लागले. मुंबईत सुरू असलेल्या पावसामुळे शिवाजी पार्क आणि आझाद मैदानात चिखल झाला असून, पाणी साचल्याने शिंदे गटाने आझाद मैदानातून तयारी हलवून नेस्को सेंटरची निवड केली आहे. ठाकरे गटानेही पावसाचा धोका लक्षात घेऊन वरळी डोमची चाचपणी सुरू ठेवली आहे.