नाशिक : नाशिकच्या देवळाली कँम्प येथील आर्टिलरी सेंटरमध्ये तोफगोळा डागण्याच्या सरावाच्या वेळी दोन अग्निवीरांचा दुर्दैवी मृत्यू झाला आहे. आर्टिलरी सेंटरमध्ये गुरुवारी तोफगोळा तोफेत भरत असताना त्याचा स्फोट झाला. यात अग्निवीर गोहिल विश्वराज सिंह (२०) व सैफत शित (२१) यांचा मृत्यू झाला.

अधिकाऱ्यांनी सांगितले की, अग्निवीरांचे पथक तोफगोळा डागण्याचा सराव करत होते. तेव्हा एका तोफगोळ्याचा स्फोट झाला. यात दोन अग्निवीर गंभीर जखमी झाले. त्यांना तातडीने एम. एच. रुग्णालयात नेण्यात आले. तेथे डॉक्टरानी त्या दोघांना मृत घोषित केले. या प्रकरणाची चौकशी करण्यात येत आहे.

या अग्निवीरांना शहिदांचा दर्जा द्यावा - सुप्रिया सुळे

या अग्निवीराना शहिदांचा दर्जा मिळायला हवा, तसेच त्यांच्या कुटुंबीयांना नुकसानभरपाई मिळायला हवी, अशी मागणी राष्ट्रवादी काँग्रेस शरद पवार गटाच्या खासदार सुप्रिया सुळे यांनी केली आहे.