मुंबई : मुंबईतील वाहतूककोंडी फोडण्यासाठी मुंबई महापालिका पूल, उड्डाणपूल, भुयारी मार्ग, स्कायवॉक, पादचारी पुलाचे जाळे विस्तारणार आहे. प्रकल्प नियोजन व अंमलबजावणीसाठी मुंबई महापालिका २९ सल्लागारांची नियुक्ती करणार आहे. या प्रस्तावावरून गुरुवारी होणाऱ्या स्थायी समितीच्या बैठकीत वादळी चर्चा होण्याची शक्यता आहे.
मुंबई महापालिकेच्या हद्दीत विविध प्रकारचे उड्डाणपूल, पादचारी पूल, नाल्यावरील पूल, वाहनांसाठी भुयारी मार्ग, स्कायवॉक यांचे बांधकाम तसेच परिरक्षण हे पूल विभागामार्फत करण्यात येते. पुलांच्या बांधकामासाठी पुलाचा आराखडा, नियोजन, संकल्पचित्रे, अंदाजपत्रक व मसुदा निविदा बनविण्यासाठी सल्लागारांची आवश्यक्ता भासते. त्यामुळे पालिकेने या कामांसाठी सल्लागार नियुक्त करण्याचा निर्णय घेतला आहे. एकूण सल्लागार शुल्काच्या ३० टक्के सल्लागारास दिले जाणार आहे.
मुंबई महापालिकेत सक्षम अभियंता असताना सल्लागारांची नियुक्ती यावरून यापूर्वी स्थायी समितीच्या बैठकीत सर्वपक्षीय सदस्यांनी विरोध केला आहे.
नवीन सल्लागार पॅनेलवर ‘ही’ जबाबदारी
महापालिकेच्या मते, पाच वर्षांच्या कालावधीत, त्यातही पावसाळ्याचा विचार करून, पूल व इतर महत्त्वाच्या पायाभूत सुविधा प्रकल्पांचे नियोजन, आराखडे तयार करणे, व्यवहार्यता अहवाल, अंदाजपत्रके, निविदा कागदपत्रे आणि अंमलबजावणीदरम्यान आवश्यक तांत्रिक मार्गदर्शन अखंडितपणे उपलब्ध व्हावे, यासाठी हे नवीन सल्लागार पॅनल तयार करण्यात येत आहे.