मुंबई : मध्य रेल्वेच्या लोणावळा-बीव्हीटी यार्ड तसेच कल्याण-लोणावळा विभागातील अप यार्डमध्ये प्री नॉन-इंटरलॉकिंग आणि नॉन-इंटरलॉकिंग कामासाठी २६ नोव्हेंबर ते ६ डिसेंबर या कालावधीत विशेष ब्लाॅक घेण्यात आला आहे. या कामामुळे मेल एक्स्प्रेस गाड्यांच्या वेळापत्रकावर परिणाम होणार आहे.
ब्लाॅक कालावधीत लोणावळा–बीव्हीटी यार्डमधील यार्ड पुनर्रचना व इतर पायाभूत कामे हाती घेण्यात आली आहेत. २६ आणि २७ नोव्हेंबर रोजी सकाळी ११.२५ ते सायंकाळी ६.२५ वाजेपर्यंत घेण्यात आलेल्या ब्लाॅकमुळे जोधपूर-हडपसर एक्स्प्रेस कर्जत येथे ४५ मिनिटांसाठी थांबवण्यात येणार आहे. तर सीएसएमटी-चेन्नई एक्स्प्रेस लोणावळा येथे एक तास, एलटीटी-मदुराई एक्स्प्रेस भिवपुरी रोड येथे १० मिनिटे, सीएसएमटी-भुवनेश्वर कोणार्क एक्स्प्रेस, सीएसएमटी-हैदराबाद एक्स्प्रेस लोणावळा येथे १० ते १५ मिनिटे थांबवण्यात येणार आहे. तसेच २७ नोव्हेंबर रोजी एलटीटी-काकीनाडा एक्स्प्रेस भिवपुरी रोड येथे १० मिनिटे थांबवण्यात येईल. २८ आणि २९ नोव्हेंबर रोजी सीएसएमटीवरून सुटणारी सीएसएमटी-होस्पेट एक्स्प्रेस उशिरा सुटेल. त्याचप्रमाणे २९ नोव्हेंबर रोजी मदुराई-एलटीटी अतिजलद एक्स्प्रेस एलटीटी १० ते १५ मिनिटे उशिरा पोहोचेल.
निळजे-दातिवली दरम्यान ब्लाॅक
शीळफाटा येथील उड्डाणपुलाच्या कामानिमित्त निळजे-दातिवली दरम्यान चार दिवसांचा ब्लॉक घेण्यात आला आहे. डेडिकेटेड फ्रेट कॉरिडॉर कॉर्पोरेशन प्रकल्पासाठी शीळ फाटा येथे असलेला उड्डाणपूल हटविण्याच्या कामासाठी हा ब्लाॅक घेतला आहे. हा ब्लाॅक २५ नोव्हेंबर, ३० नोव्हेंबर, २ आणि ७ डिसेंबर रोजीच्या मध्यरात्री १.१० ते ०४.१० वाजेपर्यंत असेल. ब्लाॅकमुळे लांब पल्ल्याच्या रेल्वे वेळापत्रकावर परिणाम होणार आहे. कालावधीत मंगळुरू ते सीएसएमटी अतिजलद एक्स्प्रेस कळंबोली येथे ५० मिनिटे थांबविण्यात येईल. ३० नोव्हेंबर, ७ डिसेंबर रोजी दौंड ते ग्वाल्हेर अतिजलद एक्स्प्रेस कर्जत-कल्याण-वसई रोड मार्गे वळविण्यात येईल. या गाडीला कल्याण येथे थांबा देण्यात येणार आहे.