मुंबई : गिरगाव, दादर, जुहू चौपाटीवर होणाऱ्या सार्वजनिक गणेश मंडळांच्या गणपतीचा विसर्जन सोहळा पाहण्यासाठी लाखोंच्या संख्येने नागरिक घराबाहेर पडतात. या प्रवाशांच्या सोयीसाठी अनंत चतुर्दशीच्या दिवशी पश्चिम रेल्वेने रात्री जादा आठ लोकल फेऱ्या चालवण्याचा निर्णय घेतला आहे.
सार्वजनिक मंडळांच्या गणरायाचे विसर्जन अनंत चतुर्दशीच्या दिवशी होते. त्यामुळे गणपती दर्शनासाठी मोठ्या संख्येने लोक घराबाहेर पडतात. भाविकांची गर्दी लक्षात घेऊन पश्चिम रेल्वेने अनंत चतुर्दशी दिवशी मंगळवारी मध्यरात्रीपासून ते पहाटेपर्यंत अप आणि डाऊन मार्गावर प्रत्येकी चार लोकल चालवण्याचा निर्णय घेतला आहे. त्यानुसार चर्चगेटहून विरारसाठी रात्री १.१५, १.५५, २.२५ आणि पहाटे ३.२० वाजता लोकल सुटेल. परतीच्या मार्गावर विरारहून चर्चगेटसाठी रात्री १२.१५, १२.४५, १.४० आणि पहाटे ३ वाजता लोकल चालविण्यात येणार आहेत. तसेच चर्चगेट ते विरार आणि विरार ते चर्चगेट यादरम्यान धीम्या मार्गावर लोकल उपलब्ध असतील.