मुंबई : मेगाब्लॉक किंवा रेल्वे रुळावरून लोकल घसरणे असो, गेल्या दोन आठवड्यापासून मध्य रेल्वेच्या उपनगरीय लोकलचा खेळखंडोबा झाला होता. त्यामुळे प्रवाशांना प्रचंड मनस्ताप सहन करावा लागला. अखेर रेल्वे मंडळाने सिग्नल नियमात शिथिलता दिल्यानंतर तब्बल १६ दिवसांनी लोकल पूर्वपदावर आली. मंगळवार सकाळपासून लोकल वेळेत धावल्याने दिवसभरात एकही लोकल रद्द करावी लागली नाही. यामुळे प्रवाशांनी सुटकेचा नि:श्वास टाकला आहे.

छत्रपती शिवाजी महाराज टर्मिनस (सीएसएमटी) येथे नॉन-इंटरलॉकिंग आणि फलाट क्रमांक १०-११ च्या विस्तारीकरणाच्या कामासाठी मध्य रेल्वेने ३१ मे ते २ जूनपर्यंत ३६ तासांचा ब्लॉक घेतला होता. यासाठी वडाळा ते सीएसएमटी आणि भायखळा ते सीएसएमटी स्थानकादरम्यान लोकल रद्द करण्यात आल्या होत्या. यामुळे लोकल आणि एक्स्प्रेस प्रवाशांचे प्रचंड हाल झाले.

ब्लॉकनंतर लोकल सुरळीत धावतील, अशी आशा प्रवाशांना होती. मात्र दुसऱ्याच दिवशी लोकल सेवा कोलमडली. सलग १६ दिवस लोकल सेवा ३० ते ३५ मिनिटे किंवा त्याहूनही अधिक वेळ उशिराने धावत होत्या. यामुळे प्रवाशांना लोकलसेवेचा मोठा फटका बसला होता.

लोकल सेवा सुरळीत करण्यासाठी मध्य रेल्वेने रेल्वे मंडळाला पत्र पाठवून सिग्नल नियम शिथिल करण्याची मागणी केली. रेल्वे मंडळाने शुक्रवारी नियम शिथिल केले. त्यानंतर शनिवारपासून नेहमीप्रमाणे लोकल चालवण्यास सुरुवात केली. मात्र रविवार आणि सोमवारी सुट्टीचे वेळापत्रकानुसार लोकल चालविण्यात आल्याने लोकल काही वेळ विलंबाने धावत होत्या. मात्र मंगळवारी लोकल वेळापत्रकानुसार धावत होत्या.