मुंबई : मल्टिड्रग-रेझिस्टंट ट्युबरकुलोसिस (एमडीआर-टीबी) म्हणजेच औषध-प्रतिबंधक क्षयरोगाच्या रुग्णांसाठी उपचार अधिक परवडणारे करण्याच्या दिशेने एक महत्त्वपूर्ण पाऊल उचलत, भारतीय पेटंट कार्यालयाने ‘ग्लोबल अलायन्स फॉर टीबी ड्रग डेव्हलपमेंट’ (टीबी अलायन्स) चा पेटंट अर्ज फेटाळून लावला आहे. पेटंट कायद्यांतर्गत नवीनतेचा अभाव, संशोधनाचे वेगळेपण किंवा नावीन्य नसणे आणि इतर कायदेशीर निकषांच्या आधारे कार्यालयाने हे पेटंट नाकारले. या निर्णयामुळे 'बीपीएएल' उपचार पद्धतीमध्ये वापरल्या जाणाऱ्या औषधांच्या स्वस्त उपलब्धतेला अधिक बळ मिळाले आहे.
म्हणून अर्ज फेटाळला
'कॉम्बिनेशन अँटीबॅक्टेरियल कंपोजिशन अँड शॉर्ट कोर्स अँटीबॅक्टेरियल रेजिमेन' या शीर्षकाखाली हे पेटंट दाखल करण्यात आले होते. टीबी रुग्ण हक्क कार्यकर्ते एल्ड्रेल टेलिस आणि गणेश आचार्य तसेच 'दिल्ली नेटवर्क ऑफ पॉझिटिव्ह पीपल' (डीएनपी+) यांनी पेटंट कायद्याच्या कलम २५(१) अंतर्गत पूर्व-अनुदान आक्षेप नोंदवून या अर्जाला विरोध केला होता. त्यानंतर पेटंट कंट्रोलरने कायद्याच्या कलम १५ अंतर्गत हा अर्ज फेटाळून लावला.