मुंबईतील गणेशोत्सवाचा मुख्य आकर्षण असलेल्या लालबागच्या राजाला अखेर भावपूर्ण निरोप देण्यात आला. तब्बल २२ ते २३ तास चाललेल्या राजेशाही विसर्जन मिरवणुकीनंतर शनिवारी (दि. २६) सकाळी १०:४५ च्या सुमारास गिरगाव चौपाटीवर लालबागच्या राजाचे विसर्जन करण्यात आले. 'गणपती बाप्पा मोरया, पुढच्या वर्षी लवकर या'च्या जयघोषात हजारो भाविकांनी बाप्पाला निरोप दिला.
२२ तास चालली मिरवणूक
लालबागच्या राजाची विसर्जन मिरवणूक शुक्रवारी सुरू झाली. लालबागहून निघालेला बाप्पाचा रथ नियोजित मार्गावरून गिरगाव चौपाटीकडे रवाना झाला. या संपूर्ण मार्गावर भाविकांची मोठी गर्दी होती. ठिकठिकाणी पुष्पवृष्टी आणि ढोल-ताशांच्या गजरात बाप्पाचे स्वागत करण्यात आले.
गिरगाव चौपाटीवर हजारो भाविक
शनिवारी सकाळी लालबागचा राजा गिरगाव चौपाटीवर पोहोचल्यानंतर अंतिम दर्शनासाठी मोठी गर्दी झाली. समुद्रकिनारी भाविकांचा मोठा जनसमुदाय जमला होता. अखेर सकाळी १०.४७ वाजता बाप्पाचे विसर्जन करण्यात आले. यावेळी भाविकांनी जयघोष करत आपल्या लाडक्या राजाला निरोप दिला.
लालबागच्या राजाच्या विसर्जनाने मुंबईतील बारा दिवसांच्या गणेशोत्सवाची सांगता झाली. बाप्पाच्या पुढील वर्षीच्या आगमनाची आस मनात ठेवत भाविकांनी ‘पुढच्या वर्षी लवकर या’ असा जयघोष केला.