मुंबई : काही महिन्यांपूर्वी उच्च न्यायालयाने जलस्त्रोतात पीओपी मूर्तींच्या विसर्जनाला बंदी घातली होती. दरम्यान माघी गणेशोत्सवातील मूर्तींच्या कृत्रिम तलावातील विसर्जनाला मंडळांनी विरोध करीत काही गणेश मंडळांनी गणेशमूर्ती विसर्जित न करण्याचा निर्णय घेतला. आता जवळपास साडेपाच महिन्यांनी उच्च न्यायालयाने पीओपीच्या उंच मूर्तीचे नैसर्गिक जलस्रोतात विसर्जन करण्यास परवानगी दिल्याने या मंडळांना मोठा दिलासा मिळाला आहे. या निर्णयानंतर आता माघी गणेशोत्सवात विसर्जित न झालेल्या गणेशमूर्तींचे येत्या २ ऑगस्ट रोजी विसर्जन करण्याचा निर्णय मंडळांनी घेतला आहे. पश्चिम उपनगरातील चारकोपचा राजा तसेच कांदिवलीच्या श्री या मंडळांचा त्यात समावेश आहे.

पर्यावरणापूरक गणेशोत्सव साजरा करण्यासाठी पीओपी मूर्तीवर बंदी आणण्याचा प्रयत्न सुरू होता. पर्यावरणपूरक गणेशोत्सव साजरा करण्यात यावा, असे आवाहन पालिकेकडून सातत्याने केले जात आहे. यंदाच्या माघी गणेश जयंती उत्सवात पीओपी गणेशमूर्तीची कुठेही विक्री होऊ देऊ नका, झालीच तर त्या गणेशमूर्तीचे विसर्जन करू देऊ नका, असे आदेश उच्च न्यायालयाने ३० जानेवारी रोजी राज्य प्रदूषण नियंत्रण मंडळ (एमपीसीबी), राज्य सरकार आणि मुंबई महापालिकेसह अन्य महापालिकांना दिले होते. या पार्श्वभूमीवर माघी गणेशोत्सवात मात्र महापालिकेने पीओपी मूर्तीच्या विसर्जनास बंदी घातली. १२ किंवा १३ फुटांपर्यंतच्या उंच मूर्तीचे विसर्जन करण्यासाठी खास कृत्रिम तलावही तयार केले.

तोपर्यंत विसर्जन न करण्याची भूमिका न्यायालय दिलासा देत

नाही तोपर्यंत विसर्जन न करण्याची भूमिका या मंडळांनी घेतली. अखेर नुकताच न्यायालयाकडून नैसर्गिक जल स्रोतात विसर्जनाला परवानगी देण्यात आल्याने या मंडळांनी येत्या २ ऑगस्टला गणेशमूर्तीचे विसर्जन करण्याचा निर्णय घेतला असल्याची माहिती चारकोपचा राजा मंडळाने दिली आहे.