मुंबई : विधान परिषदेचे माजी विरोधी पक्षनेते आणि शिवसेना (ठाकरे) नेते अंबादास दानवे यांची मुदत २९ ऑगस्ट रोजी संपुष्टात आली. त्यामुळे त्यांना देण्यात आलेला अजिंक्यतारा शासकीय बंगला आता मंत्री संजय शिरसाट यांना देण्यात आला आहे.
दानवे यांनी मागील अडीच वर्षे विधान परिषदेतील विरोधी पक्षनेते म्हणून कामकाज केले. परंतु २९ ऑगस्टला त्यांची मुदत संपली. मुदत संपल्यानंतर सामान्य प्रशासन विभागाने हा बंगला रिकामा करण्यास सांगितले होते. त्यानंतर दानवे यांनी ‘अजिंक्यतारा’ बंगला रिकामा करून दिला. गेल्या काही दिवसांपासून रिकामा असलेला बंगला आपल्याला मिळावा, अशी विनंती संजय शिरसाट यांनी केली होती. त्यानुसार शासनाने मंत्रालयाशेजारील अजिंक्यतारा बंगला शिरसाट यांना देण्याचा निर्णय घेण्यात आला आहे.
शिरसाट यांना यापूर्वी अंबर हे निवासस्थान देण्यात आले होते. मात्र, ते निवासस्थान रिकामी करण्याचे निर्देश अवर सचिव संगीता शिंदे यांनी दिले आहेत. या संदर्भातील आदेशाची प्रत राज्यपाल सचिवालय, मुख्यमंत्री कार्यालय व विधान परिषद सचिवालय यांना देण्यात आली आहे.