शेफाली परब / मुंबई

गोरेगाव येथील मृणालताई गोरे उड्डाणपुलाच्या विस्तारीकरणाचे रखडलेले काम अखेर सात वर्षांनंतर अंतिम टप्प्यात आले आहे. येत्या ३१ मेपर्यंत या पुलाचे बांधकाम पूर्ण होईल, अशी माहिती पालिकेच्या वरिष्ठ अधिकाऱ्यांनी दिली. त्यानंतर वाहतूक पोलिसांच्या आवश्यक परवानग्या मिळवून हा पूल वाहनांसाठी खुला करण्यात येईल.

सध्या या पुलाच्या बांधकामातील प्रदीर्घ विलंबामुळे प्रवाशांना नाहक त्रासाला सामोरे जावे लागत आहे. त्यातच या प्रकल्पाचा खर्च तब्बल ३८.३३ कोटी रुपयांनी वाढल्याने पालिका स्थायी समितीने यावर तीव्र आक्षेप घेतला आहे. कंत्राटदाराने ३० एप्रिलची मुदत पाळली नसल्याने पालिकेने सुरुवातीला २५ हजार रुपये प्रतिदिन दंड ठोठावला होता, तो नंतर वाढवून प्रतिदिवस १ लाख रुपये करण्यात आला आहे.

हा उड्डाणपूल सुरू झाल्यामुळे पश्चिम द्रुतगती महामार्गावर ये-जा करणे सोपे होणार असून गोरेगावमधील वाहतूक कोंडी फुटेल, असा विश्वास ‘लोखंडवाला ओशिवरा सिटीझन्स असोसिएशन’चे धवल शाह यांनी व्यक्त केला. तसेच अंधेरी आणि ओशिवरा दरम्यान प्रवास करणाऱ्या नागरिकांना याचा मोठा फायदा होईल, असेही ते पुढे म्हणाले.

पूल ३१ मेपर्यंत वाहतुकीसाठी सज्ज होण्याची शक्यता

बांधकामासाठी आवश्यक असलेल्या एलपीजी तुटवड्यामुळे यापूर्वी पुलाची मुदत ३० एप्रिलपर्यंत वाढवण्यात आली होती. स्थायी समितीच्या सदस्यांनी प्रत्यक्ष जागेची पाहणी करून कामाला गती देण्याचे आदेश दिल्यानंतर आता अंतिम टप्प्यातील कामे वेगाने सुरू आहेत. सध्या वाहतूक संकेतस्थळ, विजेचे खांब, पर्जन्यवाहिनी जोडणे आणि रंगकाम ही कामे सुरू आहेत. ३१ मेपर्यंत काम पूर्ण झाल्यावर वाहतूक विभागाशी चर्चा करून पूल खुला केला जाईल, असे अतिरिक्त पालिका आयुक्त अभिजित बांगर यांनी सांगितले.