मुंबईतील वांद्रे रिक्लेमेशन उड्डाणपुलाजवळ सुरू असलेल्या मेट्रो २बी प्रकल्पाच्या बांधकामस्थळी सोमवारी रात्री आग लागल्याची घटना घडली. उंचावरील मेट्रो मार्गावरून जळणारे अवशेष खालील वाहतुकीजवळ पडल्याने काही काळ वाहनचालकांमध्ये भीतीचे वातावरण निर्माण झाले. या घटनेचे व्हिडीओ सोशल मीडियावर व्हायरल झाल्यानंतर सुरक्षेच्या उपाययोजनांबाबत प्रश्न उपस्थित करण्यात आले आहेत.

व्हायरल व्हिडीओमुळे खळबळ

ही घटना सोमवारी रात्री सुमारे ११ वाजण्याच्या सुमारास घडली. वांद्रे पूर्व आणि वांद्रे पश्चिमेला जोडणाऱ्या महत्त्वाच्या मार्गावरील मेट्रो २बीच्या उभारण्यात येत असलेल्या केबल-स्टेड भागात आग लागल्याचे समोर आले. घटनास्थळावरील व्हिडीओमध्ये उंचावरील संरचनेतून धुराचे लोट आणि आगीच्या ज्वाळा दिसत असून, त्याचवेळी खालील रस्त्यावर वाहतूक सुरू असल्याचेही दिसून आले.

एमएमआरडीएचे स्पष्टीकरण

घटनेनंतर मुंबई महानगर प्रदेश विकास प्राधिकरणाने (एमएमआरडीए) अधिकृत निवेदन जारी केले. त्यानुसार, रात्री १०.५२ वाजता मेट्रो २बी प्रकल्पाच्या पी-४०० (डावीकडील बाजू), पायलन-४च्या चौथ्या स्तरावर आग लागल्याची माहिती मिळाली होती.

एमएमआरडीएने दिलेल्या माहितीनुसार, बांधकामासाठी वापरण्यात येणाऱ्या लाकडी शटरिंग साहित्याला आग लागली होती. घटनेची माहिती मिळताच प्रकल्पाच्या आपत्कालीन पथकाने आणि मुंबई अग्निशमन दलाने तातडीने घटनास्थळी धाव घेत आग आटोक्यात आणली.

जीवितहानी नाही, चौकशी सुरू

या घटनेत कोणतीही जीवितहानी झाली नसून मेट्रोच्या संरचनेचेही कोणतेही नुकसान झाले नसल्याचे एमएमआरडीएने स्पष्ट केले आहे. आगीचे नेमके कारण अद्याप समोर आले नसून त्याबाबत सविस्तर चौकशी सुरू करण्यात आली आहे.

सुरक्षेच्या नियमांबाबत कठोर भूमिका

प्रकल्पस्थळी सुरक्षेबाबत कोणतीही तडजोड सहन केली जाणार नाही, अशी भूमिका एमएमआरडीएने मांडली आहे. सुरक्षेच्या नियमांचे उल्लंघन करणाऱ्या संबंधित यंत्रणा किंवा कंत्राटदारांविरोधात करारातील तरतुदींनुसार कारवाई करण्यात येईल, असेही प्राधिकरणाने म्हटले आहे.

सुरक्षा उपाययोजना आणखी कडक

ज्या पॅकेजमध्ये ही घटना घडली, त्या मेट्रो २बी प्रकल्पाचे काम जे. कुमार इन्फ्राप्रोजेक्ट्स लिमिटेडकडून करण्यात येत असून एआयसीए कन्सोर्टियम हे या प्रकल्पाचे सर्वसाधारण सल्लागार म्हणून काम पाहत आहे. भविष्यात अशा घटना टाळण्यासाठी सर्व मेट्रो बांधकामस्थळी सुरक्षेच्या उपाययोजना अधिक कडक करण्यात आल्याची माहितीही अधिकाऱ्यांनी दिली.