मुंबई : पर्यावरणाच्या संवर्धनासाठी झाडांची निगा राखणे काळाची गरज बनली आहे. 'झाडे लावा, झाडे जगवा' या उपक्रमांतर्गत आता झाडांचे संवर्धन करण्यासाठी झाडांच्या मुळाभोवती 'लोखंडी ग्रिल्स' बसवण्यात येत आहे. वांद्रे कुर्ला संकुलात झाडांच्या मुळाभोवती स्मार्ट कवच बसवण्यात आले असून या ठिकाणचा प्रयोग यशस्वी झाल्यानंतर मुंबईत अन्य ठिकाणी अशाच प्रकारे झाडांचे संवर्धन करण्यात येणार आहे.
पादचारी मार्गावर असलेल्या झाडांच्या मुळाजवळ कचरा, प्लास्टिकच्या बाटल्या सर्रास फेकल्या जातात. यामुळे झाडांच्या मुळांना पाणी मिळण्यास अडचण निर्माण होते. त्यामुळे झाडांची मुळे संरक्षित करण्यासाठी विविध उपक्रम राबवण्यात येत असून त्यापैकी एक म्हणजे झाडांच्या मुळाभोवती लोखंडी ग्रील बसवण्यात येत आहेत. ग्रील बसवल्याने झाडांच्या मुळांभोवती जागा संरक्षण केली जाईल आणि झाडाच्या मुळांना हवा पाणी योग्यरीत्या मिळेल. प्रायोगिक तत्त्वावर बीकेसी परिसरात या ग्रिल्स बसवण्यात आल्या आहेत.
समतोल साधण्याचा प्रयत्न
नवीन उपक्रमामुळे पावसाचे पाणी सहज मुळांपर्यंत पोहोचते झाडांच्या वाढीसही मदत होते. पर्यावरण संरक्षण आणि शहरी सुशोभीकरण यांचा समतोल साधण्याचा हा प्रयत्न असल्याचे अधिकाऱ्याने सांगितले.