मुंबई : मुंबईतील रस्ते आणि फुटपाथवर कचरा टाकण्याची समस्या कमी करण्यासाठी महापालिकेकडून गर्दीच्या ठिकाणी ठराविक अंतरावर कचरापेट्या बसविण्याचे नियोजन करण्यात आले आहे. मात्र, केवळ कचरापेट्या बसविण्याऐवजी त्या नेमक्या कोणत्या ठिकाणी आणि किती अंतरावर असाव्यात, याचा शास्त्रशुद्ध अभ्यास करण्यात येणार आहे. यासाठी संस्थेची निवड करण्यात येणार असून, निवड झालेली संस्था जीआय पद्धतीचा वापर करून मुंबई महापालिकेच्या २३ वॉर्डांमध्ये कचरापेट्यांसाठी योग्य जागा निश्चित करणार आहे.
महापालिकेच्या नियोजनानुसार ४० लिटर क्षमतेच्या कचरापेट्या गर्दीच्या ठिकाणी फुटपाथवर बसविण्यात येणार आहेत. नागरिकांची वर्दळ, पादचाऱ्यांची संख्या आणि परिसरातील कचऱ्याचे प्रमाण यानुसार कचरापेट्यांमधील अंतर ३०, ५० किंवा १०० मीटर ठेवण्याचा विचार आहे. त्यामुळे सर्वच ठिकाणी एकसारख्या अंतरावर कचरापेट्या बसविण्याऐवजी स्थानिक परिस्थितीनुसार त्यांचे नियोजन केले जाणार आहे.
गर्दीच्या ठिकाणी अधिक गरज
गेट वे ऑफ इंडिया परिसरात पर्यटक आणि नागरिकांची मोठी वर्दळ असते. त्यामुळे अशा ठिकाणी ५० मीटरच्या अंतरावर कचरापेट्या बसविल्यास त्यांचा नागरिकांना अधिक उपयोग होऊ शकतो. त्याचप्रमाणे भेंडी बाजारसारख्या अत्यंत गर्दीच्या आणि मोठ्या प्रमाणात पादचारी वर्दळ असलेल्या परिसरात ३० मीटर अंतरावर कचरापेट्या बसवणे अधिक परिणामकारक ठरू शकते.
अडथळा, चोरीला जाण्याची शक्यता
याउलट ज्या ठिकाणी नागरिकांची किंवा पादचाऱ्यांची वर्दळ कमी आहे, अशा ठिकाणी मोठ्या संख्येने कचरापेट्या बसवल्यास त्यांचा प्रत्यक्ष वापर कमी होण्याची शक्यता आहे. तसेच फुटपाथवर अनावश्यकपणे ठेवलेल्या कचरापेट्यांमुळे जागा अडण्याबरोबरच त्या चोरीला जाण्याची अथवा नुकसान होण्याची शक्यताही निर्माण होऊ शकते.
भौगोलिक परिस्थिती पाहून मांडणी
त्यामुळे कचरापेट्यांची संख्या वाढवण्यापेक्षा जिथे गरज आहे, तिथेच योग्य अंतरावर कचरापेट्या बसवणे हा महापालिकेचा उद्देश आहे. जीआय पद्धतीच्या अभ्यासातून गर्दीची ठिकाणे, पादचारी वर्दळ, विद्यमान कचरा संकलन व्यवस्था आणि परिसराची भौगोलिक परिस्थिती यांचा विचार करून कचरापेट्यांची ठिकाणे निश्चित करण्यात येणार आहेत. या अभ्यासानंतर २३ वॉर्डांमध्ये कचरापेट्या बसवण्याचे अधिक शास्त्रशुद्ध नियोजन करता येणार आहे.