स्वीटी भागवत
मुंबई : आशियातील सर्वात मोठ्या शहरी नूतनीकरण प्रकल्पात एक महत्त्वाचा टप्पा गाठला असून एन. एम. जोशी मार्ग - लोअर परळ (डिलाईल रोड) येथील बीडीडी चाळीतील ५५७ कुटुंबांना ६ नोव्हेंबरला मुख्यमंत्र्यांच्या हस्ते नवीन घरांच्या चाव्या सुपूर्द करण्यात येणार आहेत. त्यामुळे गेले अनेक वर्षे प्रशस्त घरांच्या प्रतीक्षेत असलेल्या कुटुंबांची दिवाळी या वर्षी नव्या घरात साजरी होणार आहे. नरिमन पॉईंट येथील यशवंतराव चव्हाण सेंटरमध्ये दुपारी १२ वाजता आयोजित विशेष कार्यक्रमात मुख्यमंत्री देवेंद्र फडणवीस यांच्या हस्ते घरांच्या चाव्यांचे वितरण केले जाणार आहे.
दुसऱ्या टप्प्यातील घडामोडी, ट्रान्झिट रेंट
दुसऱ्या टप्प्यासाठी १५ चाळींमधील १,२०० गाळेधारकांची पात्रता निश्चित करण्यात आली आहे. ऑगस्ट २०२६ पासून त्यांना दरमहा ३० हजार रुपये आगाऊ ट्रान्झिट भाडे ११ महिन्यांसाठी दिले जात आहे.
पुनर्विकसित वस्ती ही एक स्वयंपूर्ण टाऊनशिप म्हणून नियोजित करण्यात आली असून यात कल्याण केंद्र, रुग्णालय, सांडपाणी प्रक्रिया प्रकल्प, सौरऊर्जा प्रणाली आणि रेन वॉटर हार्वेस्टिंगचा समावेश आहे. म्हाडा पुढील १२ वर्षे या सर्व सामायिक सुविधांची देखभाल करणार आहे.
६८४ फ्लॅट्स अंतिम टप्प्यात
या प्रकल्पात दोन टप्प्यांत १४ पुनर्वसन विंग्स आहेत ज्यामध्ये २,५६० गाळे असतील. ५५७ फ्लॅट्स दिले जात असून ६८४ फ्लॅट्सचे बांधकाम अंतिम टप्प्यात आहे.
आधुनिक सुविधा
विट्रिफाइड टाईल्स आणि ॲल्युमिनियम खिडक्या
ग्रॅनाइटचे किचन प्लॅटफॉर्म आणि ब्रँडेड प्लंबिंग फिटिंग्ज
अग्निशमन यंत्रणा
२२ मजली भूकंपरोधक इमारती
प्रत्येक मजल्यावर सीसीटीव्ही कॅमेरे, दोन पॅसेंजर लिफ्ट, एक फायर लिफ्ट
तीन मजली बेसमेंट पार्किंग, स्टिल्ट एरिया आणि पोडियमची सुविधा
प्रकल्पाची ठळक वैशिष्ट्ये
म्हाडाच्या मुंबई मंडळाद्वारे राबविण्यात येत असलेल्या एन. एम. जोशी मार्ग पुनर्विकासाच्या पहिल्या टप्प्यात एकूण सात विंग्सचे बांधकाम सुरू आहे. त्यापैकी तयार झालेल्या ५५७ फ्लॅट्स तीन विंग्समध्ये पसरलेले आहेत.
या प्रकल्पामुळे गेल्या दोन ते तीन पिढ्यांपासून १३.४९ एकर जागेवर पसरलेल्या ३२ जुन्या चाळींमधील अवघ्या १६० चौरस फुटांच्या छोट्या खोल्यांमध्ये राहणाऱ्या रहिवाशांचे जीवन पूर्णपणे बदलणार आहे. आता त्यांना पूर्णपणे मोफत आणि मालकी हक्काचे ५०० चौरस फूट कार्पेट एरिया असलेले आधुनिक टूबीएचके फ्लॅट्स मिळणार आहेत.
सोहळ्याचे थेट प्रक्षेपण
सर्व लाभार्थ्यांना हा सोहळा पाहता यावा यासाठी म्हाडा आपल्या अधिकृत यूट्यूब आणि फेसबुक चॅनल (@mhadaofficial) वर या कार्यक्रमाचे थेट प्रक्षेपण (Live-streaming) करणार आहे. लोअर परळ येथील प्रकल्पस्थळी ज्येष्ठ लाभार्थ्यांसाठी ५०० जणांची बसण्याची क्षमता असलेला आणि एलईडी स्क्रीन असलेला विशेष मंडप उभारण्यात आला आहे. साइट ऑफिसमधून प्रवेशपत्रिका उपलब्ध करून देण्यात आल्या असून ट्रान्झिट कॅम्पपासून ते कार्यक्रमाच्या ठिकाणापर्यंत प्रत्येक पात्र कुटुंबामागे एका व्यक्तीसाठी वाहनांची व्यवस्था करण्यात आली आहे.