मुंबई : पादचारी प्रथम अभियानांतर्गत मुंबई पालिकेच्या एन विभागाने घाटकोपर पूर्वेकडील अंकुश गावडे मार्गावरील फुटपाथवरील बेकायदा बांधकामे स्टॉल तसेच दुकाने जमीनदोस्त केली. या कारवाईमुळे घाटकोपर मधील ६०० मीटर लांबचा परिसर अतिक्रमणमुक्त करण्यात आला आहे.
आयुक्त अश्विनी भिडे यांच्या आदेशानुसार पादचारी प्रथम अभियान राबविण्यात येत आहे. या अभियानांतर्गत घाटकोपर पूर्व याठिकाणी फुटपाथवरील अतिक्रमण हटविण्यात आले असून रेल्वे स्टेशन परिसरातील पादचाऱ्यांना आता अधिक सुरक्षित व सुलभ मार्ग उपलब्ध झाला आहे. रेल्वे स्थानक परिसरात दररोज मोठ्या प्रमाणात नागरिकांची वर्दळ असते. त्यामुळे फुटपाथ मोकळे झाल्याने ज्येष्ठ नागरिक, महिला, विद्यार्थी आणि दिव्यांग नागरिकांना मोठा दिलासा मिळाला आहे.
मुंबई महापालिकेच्या परिमंडळ ५ च्या उपायुक्त संध्या नांदेडकर यांच्या मार्गदर्शनाखाली आणि एन विभागाचे सहायक आयुक्त जयदीप मोरे यांच्या नेतृत्वाखाली अतिक्रमण मुक्त फुटपाथ ही कारवाई करण्यात येत आहे.