मुंबई : ‘पादचारी प्रथम’ अभियानांतर्गत नरिमन पॉइंट येथील फ्री प्रेस जर्नल मार्गावरील फुटपाथवरच्या अतिक्रमणांवर सलग दुसऱ्या दिवशी म्हणजे गुरुवारीही हातोडा हाणण्यात आला. मुंबई महापालिकेच्या ‘ए’ वार्डने केलेल्या या कारवाई दरम्यान १५ हून अधिक फेरीवाल्यांवर कारवाईचा बडगा उगारण्यात आला. ‘अतिक्रमणमुक्त फुटपाथ’ ही कारवाई यापुढेही सुरूच राहणार असल्याचा इशारा ‘ए’ वार्डचे सहाय्यक आयुक्त उज्ज्वल इंगोले यांनी दिला आहे.
पदपथ हे पादचाऱ्यांना चालण्यासाठी असून ५० टक्के मुंबईकर याचा वापर करतात. त्यामुळे पादचाऱ्यांना सुरक्षित व सुलभ पदपथ मिळावेत यासाठी ‘पादचारी प्रथम’ हे अभियान राबविण्यात येत आहे. मुंबई महापालिकेच्या आयुक्त अश्विनी भिडे यांच्या आदेशानुसार पादचारी प्रथम अभियानांतर्गत कारवाईला २६ विभागीय कार्यालय क्षेत्रात वेग आला आहे.
नरिमन पॉइंट, बधवार पार्क येथे मोहीम
नरिमन पॉइंट येथील फ्री प्रेस जर्नल मार्गावरच्या फुटपाथवरील बेकायदा फेरीवाले, बेकायदा बांधकामे स्टॉल, दुकाने हटवण्याची मोहीम बुधवारी राबविण्यात आली. त्यानंतर सलग दुसऱ्या दिवशी म्हणजे गुरुवारी पुन्हा एकदा ‘ए’ वार्डच्या अतिक्रमण निर्मूलन विभागाच्या माध्यमातून फ्री प्रेस जर्नल मार्गावर फुटपाथवरील बेकायदा बांधकामे, स्टॉल, तात्पुरत्या शेड जमीनदोस्त करण्यात आल्या.