मुंबई : अचानक पडलेल्या पावसामुळे मुंबईतील प्रदूषणात घट झाली आहे; मात्र प्रदूषणात पुन्हा वाढ झाल्यास वेळीच धुळीवर नियंत्रण मिळवण्यासाठी जोगेश्वरी येथील ट्रॉमा केअर रुग्णालयाजवळ धूळ कमी करणारे यंत्र कार्यान्वित करण्यात आले आहे. त्यामुळे जोगेश्वरीकरांना काहीसा दिलासा मिळाला आहे.
ऑक्टोबर महिन्यात वरुणराजाने माघार घेताच हवेतील गुणवत्ता खालावल्याचे निदर्शनास आले आहे. हवेतील गुणवत्ता खालावल्यानंतर प्रदूषणात वाढ होत आहे. वाढत्या प्रदूषणामुळे मुंबईच्या आरोग्यावरही परिणाम झाला आहे मुंबई उच्च न्यायालयाने वाढत्या प्रदूषणावरून मुंबई महापालिकेसह राज्य सरकारला फैलावर घेतले. उच्च न्यायालयाने कानउघाडणी केल्यानंतर मुंबई महापालिकेने कठोर अंमलबजावणी करण्यास सुरुवात केली आहे. बांधकाम ठिकाणी नियमावली जारी केली असून, नियमांचे पालन न करणाऱ्या विकासकांवर दंडात्मक कारवाई केली जात आहे, तर काही ठिकाणी बांधकाम थांबवले आहे.
धूळ नियंत्रीत करणारे यंत्र कार्यान्वित
गेल्या काही वर्षांपासून मुंबईतील हवा दूषित होत चालली आहे आणि त्याचे दुष्परिणाम नागरीकांच्या आरोग्यावर होत आहेत. त्यामुळे वाहतूककोंडी होणाऱ्या पाच ठिकाणी खुल्या हवेतील धूळ शमन केंद्र आणि धूळ नियंत्रण प्रणाली बसवण्याचा निर्णय घेण्यात आला होता. त्यानुसार जोगेश्वरी येथील जोगेश्वरी-विक्रोळी लिंक रोडवरील ट्रॉमा केअर रुग्णालय येथील चौकात ही यंत्रणा बसवण्यात आल्याचे पालिका प्रशासनाकडून सांगण्यात आले.