मुंबई : टोरेस गुंतवणूक घोटाळ्याच्या तपासात असलेल्या मुंबई पोलिसांच्या आर्थिक गुन्हे शाखेला या प्रकरणातील आरोपींनी बल्गेरियामध्येही अशाच प्रकारच्या गुंतवणूक योजना सुरू केली असल्याची माहिती मिळाली आहे. ही माहिती पडताळण्याची प्रक्रिया सुरू असल्याचे अधिकाऱ्यांनी सांगितले.
घोटाळ्याप्रकरणी आतापर्यंत सहा जणांना अटक करण्यात आली असून नऊ आरोपी फरार आहेत. त्यापैकी आठ जण युक्रेनचे तर एक जण तुर्किएचा आहे. १२,७८३ गुंतवणूकदारांची १३० कोटी रुपयांची फसवणूक करण्यात आल्याचे या घोटाळ्याच्या चौकशीत समोर आले आहे.
आरोपींनी बल्गेरियामध्ये वेगळ्या कंपनीच्या नावाखाली नवीन गुंतवणूक योजना सुरू केल्याच्या माहितीस दुजोरा देण्यासाठी आर्थिक गुन्हे शाखेचे अधिकारी सध्या तपास करत आहेत, असे अधिकाऱ्याने सांगितले. या माहितीबाबत तथ्य आढळल्यानंतर संबंधित माहिती बल्गेरियातील कायदा अंमलबजावणी यंत्रणांना पाठवली जाईल, असेही सांगितले.
टोरेस गुंतवणूक घोटाळ्याच्या अनुषंगाने आतापर्यंत ३५ कोटी रुपयांचे मालमत्ता व रोख रक्कम जप्त करण्यात आली आहे. तपास यंत्रणेकडून कंपनीकडील गाड्या, फर्निचर, वीज उपकरणे यांचा लिलाव करण्यासाठी न्यायालयाची परवानगीही मागण्यात आली आहे. माहितीतील तथ्य स्पष्ट झाल्यानंतर व कारवाई योग्य पद्धतीने सुरू झाल्यानंतर ४० कोटी रुपये गुंतवणूकदारांना परत मिळू शकतात, अशी शक्यता तपास अधिकाऱ्यांनी व्यक्त केली.