मुंबई महापालिकेची निवडणूक जाहीर होण्यापूर्वीच ‘आयआयटी बॉम्बे’च्या नावावरून वाद उफाळून आला. केंद्रीय मंत्री डॉ. जितेंद्र सिंह यांनी केलेल्या वक्तव्यावरून मनसेप्रमुख राज ठाकरे यांनी भाजपला लक्ष्य केले होते. त्यानंतर शिवसेना उबाठा प्रमुख उद्धव ठाकरे यांनी 'बॉम्बे' नावावरून घोषणा केली. "जिथे-जिथे बॉम्बे लिहलं असेल तिथे मुंबई करू", असा थेट इशारा उद्धव ठाकरेंनी दिला.
शनिवारी (दि.२९) चारकोप विधानसभा मतदारसंघाचा दौरा आयोजित करण्यात आला होता. यावेळी उद्धव ठाकरे यांनी कांदिवली पश्चिम विभाग क्रमांक २ येथे कार्यकर्त्यांची भेट घेतली. त्यानंतर त्यांनी मालवणी महोत्सवात सहभाग घेत 'बॉम्बे'वर टीका करणाऱ्यांचा समाचार घेतला.
जिथे-जिथे बॉम्बे आहे, तिथे-तिथे मुंबई
उद्धव ठाकरे म्हणाले, "बॉम्बे हा शब्द वापरणे हे मराठी भाषिक मुंबईकरांच्या स्थानिक ओळखीला कमी लेखणारे आहे. काही राजकीय शक्ती जाणूनबुजून जुने नाव वापरून शहराची संस्कृती आणि वारसा विकृत करत आहेत", असा आरोप त्यांनी केला. पुढे ते म्हणाले, "त्यांचे नेते आले होते, ते म्हणाले, आयआयटी बॉम्बेमध्ये बॉम्बे आहे तेच बरं आहे. आमच्याकडून ते राहिलं करायचं. पण आज तुम्हाला सांगतो, जिथे-जिथे बॉम्बे आहे, तिथे-तिथे आम्ही ते मुंबई करू, मग ते शाळेचं नाव असलं तरीही,” असा इशारा उद्धव ठाकरेंनी दिला.
आम्ही खरी मराठी माणसं...
"त्यांच्या समुदायातील पूर्वीचे महापौर हिंदू नसल्यामुळे कमी खरे मानले जात होते का?" असा सवाल उद्धव ठाकरेंनी उपस्थित केला. “आम्ही खरी मराठी माणसं आहोत,” असे सांगत त्यांनी धार्मिक सीमारेषा ओलांडून एकतेचे आवाहन केले.
मुंबईकरांना कोणी तोडण्याचा प्रयत्न केला, तर...
शहराच्या ओळखीशी खेळ करणाऱ्या बाहेरच्या लोकांना इशारा देताना उद्धव ठाकरे म्हणाले, “मुंबईकरांना त्यांच्या शहराबद्दल असलेले प्रेम जर कोणी तोडण्याचा प्रयत्न केला, तर आम्ही शांत बसणार नाही.”
नेमकं प्रकरण काय?
स्थानिक स्वराज्य संस्था निवडणुकांच्या पार्श्वभूमीवर मराठी-अमराठी वाद रंगू लागला आहे. केंद्रीय विज्ञान-तंत्रज्ञान मंत्री डॉ. जितेंद्र सिंह यांनी २४ नोव्हेंबरला ‘आयआयटी, मुंबई’च्या पी. सी. सक्सेना सभागृहातील कार्यक्रमाला हजेरी लावली होती. ‘आयआयटी’च्या नावात तुम्ही ‘बॉम्बे’ कायम ठेवले आणि त्याचे ‘मुंबई’ केले नाही, याबद्दल मी खूश आहे, असे वादग्रस्त वक्तव्य केले. त्यांच्या वक्तव्याचा विरोधकांनी जोरदार समाचार घेतला असून मनसेप्रमुख राज ठाकरे यांनी यावरून भाजपवर निशाणा साधला. त्यानंतर मुख्यमंत्री देवेंद्र फडणवीस यांनी ‘आयआयटी बॉम्बे’चे नाव बदलून ‘आयआयटी मुंबई’ करावे, अशी मागणी करणारे पत्र मी स्वतः पंतप्रधान आणि केंद्रीय मानव संसाधन मंत्र्यांना लिहिणार आहे, अशी घोषणा केली. यासोबतच, ‘काही लोक सोयीस्कर भूमिका घेतात, स्वतःच्या मुलांना ज्या शाळेत शिकवतात (बॉम्बे स्कॉटिश), त्या शाळेचे नाव बदलण्याची विनंती मात्र करत नाहीत, असा टोलाही त्यांनी राज ठाकरेंना लगावला होता.