मुंबई : ताडदेव येथील वेलिंग्टन हाइट्स इमारतीसंदर्भात कोर्टाने घरे खाली करण्याचे आदेश दिल्यानंतर रहिवाशांमध्ये चिंता निर्माण झाली होती. मात्र, मुख्यमंत्री देवेंद्र फडणवीस यांच्या हस्तक्षेपामुळे रहिवाशांना अखेर न्याय मिळाला आहे.
सामान्य नागरिकांची चूक नसताना त्यांना शिक्षा होणार नाही, याची मुख्यमंत्री देवेंद्र फडणवीस यांनी घेतलेली भूमिका स्तुत्य आहे. यासाठी मुख्यमंत्र्याचे आभार व्यक्त करत, जिथे कुठे जनतेवर अन्याय होईल, तिथे जनतेच्या हितासाठी आणि त्यांच्या हक्कांचे संरक्षण करण्यासाठी मुख्यमंत्री फडणवीस त्यांच्या सोबत असतील, असा विश्वास मंत्री मंगलप्रभात लोढा यांनी व्यक्त केला.
तपासाअंती स्पष्ट झाले की या प्रकरणात रहिवाशांची काहीही चूक नसून बिल्डरकडून गंभीर फसवणूक करण्यात आली होती. अनेक वर्षांपासून प्रलंबित असलेली ऑक्युपन्सी सर्टिफिकेट व संबंधित फाईल रखडलेल्या होत्या. रहिवाशांवर अन्याय होऊ नये म्हणून मुख्यमंत्री देवेंद्र फडणवीस यांनी तातडीने कारवाई करत जर सर्व बाबींचे अनुपालन व्यवस्थित झाले असेल तर ओसी देण्याचे आदेश संबंधित विभागाला दिले, असे मंत्री मंगलप्रभात लोढा यांनी सांगितले. त्यामुळे या रहिवाशांना दिलासा मिळाला आहे.