स्वीटी भागवत/मुंबई
मुंबईच्या लक्झरी भाडे बाजारात आणखी एक उच्च-मूल्याचा व्यवहार नोंदवला गेला आहे. 'आयव्हीएल धुनसेरी पेट्रोकेम इंडस्ट्रीज प्रायव्हेट लिमिटेड'ने वरळीतील 'थ्री सिक्सस्टी वेस्ट'मधील ६,८३१ चौरस फुटांचे अपार्टमेंट दरमहा २८.५ लाख भाड्याने घेतले आहे. यामुळे हा व्यवहार सर्वोच्च मूल्याच्या निवासी भाडे करारांपैकी ठरला आहे.
'झॅपके'कडून मिळालेल्या व्यवहाराच्या आकडेवारीनुसार, हा लीव्ह अँड लायसन्स करार २८ सप्टेंबरला परवानाधारक (लायसी) असलेल्या आयव्हीएल धुनसेरी पेट्रोकेम इंडस्ट्रीज प्रायव्हेट लिमिटेड व परवाना देणारी कंपनी डिराईव्ह ट्रेडिंग अँड रिसॉर्ट्स लि. यांच्यात नोंदवला गेला.
असा आहे भाडेकरार
वरळीच्या डॉ. एनी बेझंट रोडवरील 'थ्री सिक्सस्टी वेस्ट'च्या टॉवर बीमधील १९ व्या मजल्यावर ६,८३१ चौरस फूट क्षेत्रफळ असलेले हे अपार्टमेंट अपार्टमेंट ३६ महिन्यांच्या कालावधीसाठी भाड्याने देण्यात आले. दरमहा २८.५ लाखांचे सुरुवातीचे भाडे दुसऱ्या वर्षात वाढून २९.९२ लाख प्रतिमहिना आणि तिसऱ्या वर्षात ३१.४२ लाख प्रतिमहिना होईल. तीन वर्षांच्या कालावधीतील भाडे खर्च १०.७८ कोटी आहे.