आम आदमी पक्षाचे राज्यसभेचे खासदार खासदार संजय सिंह यांच्यानंतर आता आपचे खासदार राघव चढ्ढा यांना साज्यसभेतून निलंबित करण्यात आलं आहे. तसंच संजय सिंह यांच्यादेखील अडचणी कमी होण्याऐवजी वाढल्या आहेत. त्यांच्या निलंबनाची मुदतवाढ करण्यात आली आहे. विशेषाधिकार समितीचा निर्णय येईपर्यंत आपच्या या दोन्ही खासदारांचं राज्यसभेतून निलंबन करण्यात आलं आहे.

राज्यसभेच्या पाच खासदारांनी केलेल्या दाव्यावरुन राघव चढ्ढा यांच निलंबन करण्यात आलं आहे. राज्यसभेतील पाच खासदारांनी दावा केला की, त्यांच्या संमतीशिवाय दिल्ली सेवा विधेयक निवड समितीकडे पाठवण्याच्या प्रस्तावावर त्यांच्या नावांचा उल्लेख करण्यात आला होता. राघव चढ्ढा यांनी हा प्रस्ताव मांडला होता. यात भारतीय जनता पक्षाचे तीन तर बीजेडी आणि एआयएडीएमकेच्या प्रत्येकी एका खासदाराचा समावेश आहे. यांनी या गोष्टीचा निषेध नोंदवला होता. यानंतर केंद्रीय गृहमंत्री अमित शाह यांनी या प्रकरणाच्या चौकशीची मागणी केली होती.

खासदार राघव चढ्ढा यांनी मात्र त्यांच्यावर केलेले आरोप फेटाळले आहेत. हे आरोप खोटे असल्याचं त्यांनी सांगितलं. विशेषाधिकार समितीनं पाठवलेल्या नोटीसला उत्तर देऊ असं देखील चढ्ढा म्हणाले. यावेळी बोलताना ते म्हणाले की, खासदार म्हणून आपली प्रतिमा खराब करण्याचा भाजपचा डाव असून या डावपेचांचा मी पर्दाफाश करणार आहे. तर आपने चढ्ढा यांच्यावर करण्यात आलेल्या कारवाईला 'कट' असं म्हटलं आहे. राघव चढ्ढा या तरुण आणि प्रभावी खासदाराची प्रतिष्ठा खराब करण्यासाठी भाजप ही मोहीम राबवत असून त्याचा निषेध करतो, असं आम आदमी पक्षाच्या वतिने म्हटलं गेलं आहे.