नवी दिल्ली : 'केंद्रीय अन्वेषण विभागा'ने (सीबीआय) बुधवारी 'नीट'-यूजी २०२६ परीक्षा पेपरफुटीप्रकरणी अटक केलेल्या पाचही आरोपींना दिल्ली न्यायालयासमोर हजर केले. सीबीआयचे विशेष न्यायाधीश अजय गुप्ता यांच्यासमोर या पाचही आरोपींना सादर करण्यात आले.

या आरोपींना कथित सहभागाबद्दल वेगवेगळ्या राज्यांमधून ताब्यात घेण्यात आले होते.नाशिक येथील शुभम खैरनार, जयपूर येथील मांगीलाल बिवल, विकास बिवल आणि दिनेश बिवल, तसेच गुरुग्राम येथील यश यादव अशी आरोपींची नावे आहेत. नाशिक जिल्ह्यातील नांदगाव येथील रहिवासी असलेल्या ३० वर्षीय खैरनारला मुंबईतून दोन दिवसांची ट्रान्झिट रिमांड मिळाल्यानंतर सीबीआयने दिल्लीत आणले होते. खैरनार हा परीक्षेचा पेपर लीक करण्यात कथितपणे सामील होता.