नॅशनल हेराल्ड प्रकरणात अंमलबजावणी संचालनालयाने (ईडी) काँग्रेसच्या अध्यक्षा सोनिया गांधी (sonia gandhi) यांना समन्स बजावलेले आहे. ईडीकडून सुरु झालेल्या या चौकशीच्या निषेधार्थ काँग्रेसने आक्रमक भूमिका घेतली आहे. दिल्ली, मुंबईसह काँग्रेसकडून देशव्यापी आंदोलन करण्यात येत आहे. अनेक ठिकाणी कार्यकर्ते रस्त्यावर उतरत ईडी आणि मोदी सरकारविरोधात घोषणाबाजी करताना दिसत आहे.

सोनिया गांधी आणि राहुल गांधी यांच्यावर सुरु असलेली कारवाई म्हणजे राजकीय सूड असल्याचा आरोप काँग्रेसने केला आहे. या अगोदरही राहुल गांधी यांची ईडीकडून चौकशी सुरु असताना काँग्रेसकडून देशभरात आंदोलन करण्यात आली होती.

काँग्रेस नेत्यांचा पक्ष मुख्यालयापासून संसदेपर्यंत मोर्चा

सोनिया गांधी यांच्या ईडी चौकशी विरोधात काँग्रेस नेते आणि खासदारांनी अकबर रोड येथील पक्षाच्या मुख्यालयापासून संसदेपर्यंत मोर्चा काढला आहे. तसेच पटना, बिहारमध्येही काँग्रेस कार्यकर्ते आक्रमक झाल्याचे पहायला मिळत आहे. सोनिया गांधी आणि राहुल गांधी यांच्यावर सुरु असलेली कारवाई म्हणजे राजकीय सूड असल्याचा आरोप काँग्रेसने केला आहे. तपास यंत्रणा मोदी सरकारच्या कठपुतली बाहुल्या झाल्या असून सरकारच्या इशाऱ्यावर त्या केवळ विरोधी पक्षांच्या नेत्यांवरच कारवाई करत असल्याचा आरोप काँग्रेस नेत्यांनी केला आहे.

केंद्र सरकार ईडीसह केंद्रीय संस्थांचा गैरवापर करत आहे. लोकशाही धोक्यात आल्याचे हे लक्षण आहे. आमची लढाई देश वाचवण्यासाठी असल्याची टीका राजस्थानचे मुख्यमंत्री अशोक गेहलोत यांनी केली आहे.