कोलकाता : पश्चिम बंगालच्या मुख्यमंत्री ममता बॅनर्जी यांनी राज्यातील ४०,००० दुर्गापूजा मंडळांना दिले जाणारे अनुदान ८५ हजारांवरून १.१० लाख केले आहे. याशिवाय, पूजा मंडपांसाठी वीजबिलात ८० टक्क्यांची सवलत दिली आहे. अग्निशमन परवान्यासह सर्व राज्य सरकारी शुल्कातून सूट देतानाच, कोलकाता महानगरपालिका, पंचायत व नगरपालिका यांच्याकडून करमाफीही जाहीर केली आहे.

यंदाचा दुर्गापूजा कार्निव्हल ५ ऑक्टोबरला होणार असून विसर्जन २ ते ४ ऑक्टोबरदरम्यान होईल. दुर्गा पूजेदरम्यान सुरक्षेचे उपाय म्हणून सीसीटीव्ही, ड्रोन मॉनिटरिंग, वॉच टॉवर्स, महिलांसाठी सुलभ व्यवस्था, आणि स्वतंत्र प्रवेश-निर्गम मार्ग असावेत, असे आदेशही त्यांनी दिले. तसेच अॅम्ब्युलन्स तयार ठेवणे, योग्य प्रकाशव्यवस्था आणि गर्दी नियंत्रणाचे निर्देशही दिले. दरम्यान, २०२६च्या विधानसभा निवडणुकीच्या पार्श्वभूमीवर या निर्णयाचे मंडळांकडून स्वागत, तर विरोधकांकडून टीका करण्यात आली आहे.

गणेशोत्सव मंडळांनाही अनुदानाची अपेक्षा

पश्चिम बंगाल सरकारने तेथील दुर्गापूजा मंडळांना १.१० लाख रुपये अनुदान जाहीर केल्याच्या पार्श्वभूमीवर मुंबईसह महाराष्ट्रातील गणेशोत्सव मंडळांनाही अशा प्रकारे अनुदान मिळणार का, अशी चर्चा आता गणेशभक्तांमध्ये सुरू झाली आहे.