उत्तर गोव्यातील अर्पोरा भागात असणाऱ्या बर्च बाय रोमिओ लेन (Birch by Romeo Lane) या नाईटक्लबमध्ये शनिवारी (दि.६) भीषण आग लागली. या आगीत २३ जणांचा मृत्यू झाला. या घटनेचा व्हिडीओ सध्या व्हायरल होत आहे. या व्हिडीओमध्ये आग लागण्याच्या काही सेकंदाआधीचा थरारक क्षण स्पष्टपणे कैद झाला आहे.

घटनेचा व्हिडीओ कॅमेऱ्यात कैद

व्हिडीओमध्ये एका मंचावर बेली डान्सर नृत्य करताना दिसते. साधारण दहा सेकंदांनंतर वरच्या छतामधून अचानक आग उसळताना दिसून येतेय. अवघ्या एक-दोन सेकंदांतच आग संपूर्ण छतावर पसरते. आगीचे प्रमाण वाढताच महिला डान्सर आणि अन्य कर्मचारी घाबरून पळतात. व्हिडीओत क्लबमध्ये दाटलेला धूर पाहायला मिळतोय.

या व्हिडीओमध्ये आग लागली त्या क्षणी कोणतीही अग्निसुरक्षा यंत्रणा (फायर सेफ्टी सिस्टम) कार्यरत झाल्याचे दिसून येत नाही. पोलिसांच्या माहितीनुसार, "ही आग गॅस सिलिंडरच्या स्फोटामुळे लागली."

गोव्याचे पोलीस महासंचालक म्हणाले की, "पोलिस कंट्रोल रूमला रात्री १२ वाजून ४ मिनिटांनी याची माहिती मिळाली आणि तात्काळ आपत्कालीन पथक घटनास्थळी रवाना करण्यात आले. नंतर आग नियंत्रणात आणण्यात आली आणि सर्व मृतदेह बाहेर काढण्यात आले."

नियमांचे उल्लंघन करून क्लब सुरू

गोव्याचे मुख्यमंत्री प्रमोद सावंत यांनी रात्री उशिरा घटनास्थळी भेट दिली. त्यांनी सांगितले की, "मृतांमध्ये बहुतांश किचन स्टाफ होते, त्यात तीन महिलांचा समावेश आहे. तसेच या घटनेत तीन ते चार पर्यटकांचाही मृत्यू झाला आहे. प्राथमिक तपासात या नाईटक्लबने आवश्यक अग्निसुरक्षा नियमांचे पालन केले नसल्याचे समोर आले आहे. नियमांचे उल्लंघन करून क्लब सुरू ठेवण्यास परवानगी देणाऱ्या व्यवस्थापनावर आणि संबंधित अधिकाऱ्यांवर कडक कारवाई केली जाईल," असेही त्यांनी स्पष्ट केले.