नवी दिल्ली : देशांतर्गत उपभोग आणि आयातीमधून मिळालेल्या मजबूत महसुलामुळे सप्टेंबर महिन्यात एकूण जीएसटी संकलन १४.७ टक्क्यांनी वाढून २.०३ लाख कोटी रुपयांपेक्षा अधिक झाले आहे.

शासकीय आकडेवारीनुसार, देशांतर्गत व्यवहारांमधून मिळणारा जीएसटी १०.१ टक्क्यांनी वाढून १.३८ लाख कोटी रुपयांवर पोहोचला आहे, तर आयातीवरील महसूल २६ टक्क्यांनी झपाट्याने वाढून ६५,५२५ कोटी रुपयांवर पोहोचला आहे. तर वस्तू आणि सेवा कर परतावा सप्टेंबरमध्ये ३ टक्क्यांच्या वार्षिक घसरणीसह २७,००१ कोटी रुपयांवर मंदावला आहे.

या आर्थिक वर्षाच्या पहिल्या सहामाहीत (एप्रिल-सप्टेंबर), एकूण जीएसटी संकलन ११.६ टक्क्यांनी वाढून १२.४६ लाख कोटी रुपयांहून अधिक झाले आहे. तसेच निव्वळ संकलन १०.४ टक्क्यांनी वाढून १०.६६ लाख कोटी रुपयांवर पोहोचले आहे.

जीएसटी संकलन सप्टेंबरमध्ये १४.७% वाढीसह २.०३ लाख कोटी रुपयांपेक्षा जास्त झाले आहे, तर देशंतर्गत महसूल १०.१% वाढीसह १.३८ लाख कोटी रुपये झाले आहे. आयात महसूल २६% वाढीसह ६५,५२५ कोटी रुपये झाला आहे. निव्वळ जीएसटी संकलन परताव्याचे समायोजन केल्यानंतर १८.१% वाढीसह १.७६ लाख कोटींहून अधिक राहिले आहे. चालू आर्थिक वर्षात जीएसटी संकलन २ लाख कोटी रुपयांच्या टप्प्या पार करण्याची ही तिसरी वेळ आहे.

• सप्टेंबरमधील एकूण महसूल : ₹२.०३ लाख कोटी

• सप्टेंबरमधील निव्वळ महसूल: ₹१.७६ लाख कोटी

• चालू आर्थिक वर्षाचा पहिला टप्पा (एप्रिल ते सप्टेंबर) : एकूण संकलन ₹१२.४६ लाख कोटींहून अधिक (११.६% वाढ)

(संबधित इंग्रजी बातमी वाचण्यासाठी येथे क्लिक करा.)