नवी दिल्ली : शहरात सुरू असलेल्या पावसामुळे, मुख्य निवडणूक आयुक्त ज्ञानेश कुमार यांच्या विरोधातील इंडिया आघाडीचा ‘सार्वजनिक महाभियोजन’ कार्यक्रम ३१ ऑक्टोबरपर्यंत (शनिवार) पुढे ढकलण्यात आल्याची घोषणा काँग्रेस नेते राहुल गांधी यांनी शुक्रवारी केली. काँग्रेस अध्यक्ष मल्लिकार्जुन खर्गे यांच्या १०, राजाजी मार्ग येथील निवासस्थानाबाहेर इंडिया आघाडीच्या नेत्यांसोबत घेतलेल्या संयुक्त पत्रकार परिषदेत बोलताना गांधी म्हणाले, एकमताने आम्ही आजचा कार्यक्रम उद्या याच वेळी घेण्याचा निर्णय घेतला आहे. यावेळी राहुल गांधी यांनी रविवारी "चलो दिल्ली" मोर्चा आणि रॅली काढण्यात येणार असल्याची घोषणाही केली.
लोकशाही संपवल्याचा आरोप
पंतप्रधान नरेंद्र मोदी, गृहमंत्री अमित शहा आणि मुख्य निवडणूक आयुक्त ज्ञानेश कुमार व त्यांची टीम मिळून देशातील लोकशाही उद्ध्वस्त करत आहेत. गृहमंत्री दिल्लीत लोकांना येण्यापासून रोखण्यासाठी सर्वतोपरी प्रयत्न करत आहेत. आमचे पक्षाचे कार्यकर्ते आणि सामान्य लोकांना अडवले जात आहे. रामलीला मैदानावर काय घडते ते तुम्ही पाहा, म्हणजे देशात काय चालले आहे ते तुम्हाला समजेल. लाखो लोकांचे अधिकार हिरावून घेतले जात असल्यामुळे लोकांमध्ये प्रचंड रोष आणि वेदना आहेत.
संविधानाचे रक्षण करू इच्छिणाऱ्या प्रत्येकाला या मोर्च्यात आणि रॅलीत सहभागी होण्याचे आवाहन राहुल यांनी केले. सूत्रांनी दिलेल्या माहितीनुसार, मुख्य निवडणूक आयुक्तांवरील या सार्वजनिक महाभियोजनाचे अध्यक्षपद लोकसभेच्या माजी अध्यक्षा मीरा कुमार भूषवणार आहेत. मल्लिकार्जुन खर्गे महाभियोजनाचा 'प्रस्ताव' मांडतील, तर प्रस्ताव संमत होण्यापूर्वी राहुल गांधी समारोपाचे भाषण करतील. खर्गे आणि राहुल गांधी यांच्याशिवाय आघाडीतील प्रत्येक पक्षाचा प्रत्येकी एक प्रतिनिधी या वेळी आपले विचार मांडणार आहे.