मध्य प्रदेशातील इंदूरमधील एका हॉटेलमध्ये BSF उपनिरीक्षकाला त्याच्या पत्नीने दुसऱ्या महिलेसोबत रंगेहात पकडल्याचा धक्कादायक प्रकार समोर आला आहे. पत्नी पोलिसांना सोबत घेऊन थेट हॉटेलमध्ये पोहोचली. त्यानंतर खोलीत झालेल्या गोंधळाचा व्हिडीओ सोशल मीडियावर मोठ्या प्रमाणात व्हायरल होत आहे.
संबंधित BSF उपनिरीक्षकाचं नाव आकाश निरंजन असून त्याची पत्नी रुची पटेल हिने पती पाच दिवसांपासून दुसऱ्या महिलेसोबत हॉटेलमध्ये राहत असल्याचा आरोप केला आहे.
हॉटेलच्या रूममध्ये दुसरी महिला
व्हिडीओमध्ये पत्नी काही पोलिस कर्मचाऱ्यासोबत हॉटेलमधील रूम क्रमांक १०५च्या बाहेर पोहोचताना दिसते. पतीने दरवाजा उघडल्यानंतर पोलिस खोलीची पाहणी करतात. यावेळी दुसरी महिला बाथरूममध्ये लपलेली दिसते. पोलिस दरवाजा ठोठावून तिला बाहेर येण्यास सांगतात. त्यानंतर ती महिला बाथरूममधून बाहेर येते.
या संपूर्ण प्रकारादरम्यान संबंधित BSF उपनिरीक्षक पांढऱ्या रंगाच्या टी-शर्टमध्ये दिसत आहे. पोलिसांकडून खोलीतील सामानाचीही पाहणी केली जाते.
पत्नीचा संताप, पोलिसांचा हस्तक्षेप
महिला बाथरूममधून बाहेर आल्यानंतर पती-पत्नीमध्ये जोरदार वाद सुरू होतो. पतीसोबत दुसऱ्या महिलेला पाहून पत्नी संतापलेली दिसते. यावेळी ती पतीला मारण्यासाठी पुढे जाते. मात्र, उपस्थित पोलिस कर्मचारी मध्ये पडून तिला रोखतात.
व्हिडीओच्या शेवटी एका पोलिस कर्मचाऱ्याचा आवाज ऐकू येतो. पत्नीला शांत करताना तो 'तुम्ही त्यांना असं मारू शकत नाही. या प्रकरणी योग्य ती कारवाई केली जाईल', असं सांगताना ऐकू येतो.
विवाहबाह्य संबंधांबाबत कायदा काय सांगतो?
भारतीय न्याय संहिता (BNS) २०२३ अंतर्गत केवळ विवाहबाह्य संबंध ठेवणं हा फौजदारी गुन्हा नाही. मात्र, अशा प्रकरणात मारहाण, धमकी, छळ किंवा इतर कोणताही गुन्हा घडल्यास संबंधित कायदेशीर तरतुदींनुसार कारवाई होऊ शकते. विवाहबाह्य संबंधांचा कौटुंबिक न्यायालयातील प्रकरणांमध्ये, विशेषतः घटस्फोटाच्या बाबतीत, विचार केला जाऊ शकतो.
दरम्यान, सोशल मीडियावर व्हायरल होत असलेल्या या व्हिडीओमध्ये दिसणाऱ्या व्यक्तींची ओळख आणि या घटनेची इतर पार्श्वभूमी स्वतंत्रपणे पडताळलेली नाही.