बंगळुरू : कर्नाटक काँग्रेसमधील सत्तासंघर्ष टिपेला पोहोचलेला असतानाच उपमुख्यमंत्री डी. के. शिवकुमार शनिवारी सकाळी मुख्यमंत्री सिद्धरामय्या यांच्या निवासस्थानी पोहोचले आणि तेथे त्यांनी एकत्र नाश्ताही केला. आमच्यात कोणतेही मतभेद नसून काँग्रेस हायकमांडच्या निर्णयाचा सन्मान केला जाईल, असे दोघांनीही एकत्रितपणे पत्रकार परिषदेत स्पष्ट केल्याने तूर्त राज्यातील राजकीय शिमगा शांत झाला आहे.
काँग्रेस हायकमांडने सिद्धरामय्या आणि शिवकुमार यांना सत्तासंघर्षाचा वाद मिटवूनच दिल्लीत येण्यास सुचवले होते. हायकमांडने कान टोचल्यानंतर शनिवारी सकाळी शिवकुमार ब्रेकफास्टसाठी सिद्धरामय्या यांच्या 'कावेरी' या निवासस्थानी पोहोचले. दोन्ही नेत्यांनी नाश्ता केल्याचा फोटो शिवकुमार यांनी आपल्या एक्स अकाऊंटवर शेअर केला. यानंतर दोन्ही नेत्यांनी पत्रकार परिषद घेतली.
आमच्यात कोणतेही मतभेद नाहीत आणि भविष्यातही कोणतेही मतभेद होणार नाहीत. आमचा मुख्य अजेंडा २०२८ ची विधानसभा निवडणूक आहे. स्थानिक स्वराज्य संस्थांची निवडणूकही महत्त्वाची आहे. आम्ही दोघांनी यावर चर्चा केली, अशी माहिती यावेळी सिद्धरामय्या यांनी दिली. तसेच आमच्यात इतर कोणत्याही बाबींवर चर्चा झाली नाही. आम्ही फक्त नाश्ता केला. ते आज माझ्या घरी आले आणि मलाही त्यांनी त्यांच्या घरी येण्याचे आमंत्रण दिले, असेही सिद्धरामय्या यावेळी म्हणाले.
आम्ही हायकमांड जे काही सांगेल त्याचे पालन करण्याचा निर्णय घेतला आहे. उद्यापासून कोणताही संभ्रम राहणार नाही आणि आताही कोणताही संभ्रम नाही. काही मीडिया रिपोर्ट गोंधळ निर्माण करत आहेत, असेही ते म्हणाले. भाजप आणि जेडीएसला खोटे पसरवण्याची सवय असल्याचाही आरोप त्यांनी केला.
डी. के. शिवकुमार यांनी सांगितले की, नेतृत्वाबाबत हायकमांड जो निर्णय घेईल तो आम्ही मान्य करू. आमच्यात कोणतीही गटबाजी नाही, आम्ही एकत्र काम करत आहोत, राज्यातील लोकांच्या पाठिंब्यामुळे आमचे सरकार आले आणि त्यांच्या अपेक्षा आम्हाला पूर्ण करायच्या आहेत. त्याच दिशेने आमची वाटचाल सुरू आहे.
सोनियांनीही सत्तेचा त्याग केला होता शिवकुमार यांचे सूचक विधान
सोनिया गांधी यांनी केलेल्या त्यागाचा उल्लेख करत डी. के. शिवकुमार यांनी सिद्धरामय्या यांना एक सूचक इशारा दिला आहे. सोनिया गांधी यांनी सत्तेचा त्याग केला होता. त्या काळामध्ये माजी राष्ट्रपती अब्दुल कलाम यांना सोनिया गांधी पंतप्रधान व्हाव्यात असे वाटत होते. पण सोनिया गांधी यांनी डॉ. मनमोहन सिंग यांचे नाव सुचवले होते, असे विधान डी. के. शिवकुमार यांनी केले. विशेष म्हणजे शिवकुमार यांनी जेव्हा हे विधान केले तेव्हा व्यासपीठावर सिद्धरामय्या हेही उपस्थित होते.