कोलकाता : वयाच्या ४० व्या वर्षी, वयाच्या २० व्या वर्षापेक्षा जास्त लवचिक शरीर असणे, वयाच्या ५० व्या वर्षी, ३० व्या वर्षापेक्षा जास्त ऊर्जावान असणे आणि वयाच्या ७० व्या वर्षी, ५० व्या वर्षापेक्षा जास्त निरोगी राहणे हे आपले उद्दिष्ट असायला हवे, हे योगामुळे शक्य होते, असे प्रतिपादन पंतप्रधान नरेंद्र मोदी यांनी केले.

पंतप्रधान मोदी कोलकाता येथील १२व्या आंतरराष्ट्रीय योग दिन सोहळ्यात सहभागी झाले होते. कोलकाता येथील ऐतिहासिक ‘रेड रोड’वर पंतप्रधानांसोबत हजारो लोकांनी योगसाधना केली. पंतप्रधानांनी ताडासन, अर्धचक्रासन, भद्रासन आणि त्रिकोणासन यांसह ५ आसने केली.१२व्या आंतरराष्ट्रीय योग दिनाची थीम ‘निरोगी वृद्धत्वासाठी योग’ अशी आहे.

पंतप्रधानांनी सांगितले की, योग हा जगातील सर्वात मोठा सामुदायिक उत्सव बनला आहे. जो लोक, देश आणि संस्कृतींना एकत्र जोडतो. २१ जून हा दिवस पृथ्वीवरील सर्वात मोठा दिवस मानला जातो आणि आता हा दिवस संपूर्ण जगात ‘योग दिन’ म्हणून साजरा केला जातो.

‘कॉमन योग प्रोटोकॉल’ सत्रात पंतप्रधान लोकांमध्ये पोहोचले आणि त्यांच्या योगासनाच्या मुद्रा सुधारण्यास मदत करताना दिसले.

यंदा देशा विदेशातील २५०० ठिकाणी योग दिन साजरा करण्यात आला. ज्यात २१० हून अधिक भारतीय दूतावास आणि केंद्रांचा सहभाग आहे. हे आरोग्य, सुसंवाद आणि सामूहिक कल्याणासाठी एक जागतिक चळवळ म्हणून योगाचे स्थान पुन्हा एकदा अधोरेखित करते.