अयोध्या : पंतप्रधान नरेंद्र मोदी यांच्याहस्ते अयोध्येत प्रभू श्रीरामाच्या प्रतिष्ठापनेचा कार्यक्रम २२ जानेवारीला होणार आहे. त्याची देशभर जोरदार तयारी सुरू आहे. या कार्यक्रमाला मोठ्या संख्येने देशभरातून भाविक उपस्थित राहणार असल्याने सुरक्षेच्या कारणास्तव देशभरातील विविध राज्यांचे मुख्यमंत्री आणि राज्यपालांना निमंत्रण देण्याचे टाळण्यात आले आहे.
रामलल्लाच्या प्राण प्रतिष्ठेसाठी मोठ्या संख्येने भाविक अयोध्येला पोहोचण्याची शक्यता आहे. अशा परिस्थितीत राज्यपाल आणि मुख्यमंत्र्यांशी संबंधित प्रोटोकॉलचे पालन करणे शक्य होणार नाही. सुरक्षेच्या कारणास्तव देशभरातील राज्यांचे मुख्यमंत्री आणि राज्यपालांना या कार्यक्रमात सहभागी होण्यासाठी आमंत्रित केले जाणार नाही, असा निर्णय घेण्यात आला आहे. हा कार्यक्रम उत्तर प्रदेशात होत असल्याने केवळ उत्तर प्रदेशचे मुख्यमंत्री योगी आदित्यनाथ आणि राज्यपाल प्राणप्रतिष्ठा कार्यक्रमात सहभागी होतील.

रामलल्लाच्या प्राणप्रतिष्ठापनेची जय्यत तयारी सुरू आहे. या कार्यक्रमात सहभागी होण्यासाठी लोकांना निमंत्रण पाठवण्याची प्रक्रिया सुरू झाली आहे. एकूण ७ हजार लोकांना निमंत्रण पाठवले जाणार असून त्यापैकी ३ हजार व्हीव्हीआयपी असतील. पंतप्रधान नरेंद्र मोदी, योगी आदित्यनाथ, सरसंघचालक मोहन भागवत यांच्यासह ३ हजार व्हीव्हीआयपींना निमंत्रण पाठवण्यात आले आहे. या यादीत क्रिकेटर सचिन तेंडुलकर, विराट कोहली, अभिनेता अमिताभ बच्चन, अक्षय कुमार, कंगना रणावत यांचीही नावे आहेत. याशिवाय देशभरातून ४ हजार संतांना पाचारण करण्यात आले आहे.