बंगळुरू : कांदा, बटाटा या रोजच्या जेवणातील पदार्थांचे ५० ते ६० रुपये किलोवर गेलेले असतानाच आता टोमॅटो किलोमागे १०० रुपयांपर्यंत महागला आहे. कर्नाटक, तेलंगणात काही शहरांमध्ये किरकोळ बाजारात टोमॅटो १०० रुपयांवर गेला आहे, तर मुंबईत टोमॅटो ६० ते ७० रुपये किलोने मिळत आहे. देशाच्या विविध भागात टोमॅटोच्या दरात वाढ होण्याची दाट शक्यता आहे.

कर्नाटकात म्हैसूर येथे टोमॅटोचे दर १०० रुपयांच्या आसपास पोहचले आहेत. देशातील १७ राज्यांमध्ये टोमॅटोचे भाव ५० रुपयांच्या वर गेला आहे, तर ९ राज्यांत टोमॅटो ६० रुपये किलोपेक्षा जास्त आहे, तर ४ राज्यांत टोमॅटोचा भाव ७० रुपयांपेक्षा जास्त आहे. उष्णतेची लाट आणि टोमॅटोचे घटलेल्या उत्पादनामुळे टोमॅटोच्या दरात वाढ होत आहे. देशातील केंद्रशासित प्रदेश अंदमान निकोबारमध्ये टोमॅटोचे भाव १०० रुपयांच्या पुढे गेले आहेत.