नवी मुंबई : केंद्र सरकारच्या नवीन मोटार वाहन कायद्याच्या विरोधात आंदोलनकर्त्या ट्रकचालकांनी पोलिसांवरच हल्ला केला होता. याप्रकरणी ३३ आरोपींना अटक करण्यात आली होती. या आरोपींना न्यायालयाने ५ जानेवारीपर्यंत पोलीस कोठडी फर्मविली आहे. जेएनपीटी मार्गावर ट्रकचालकांनी रास्ता रोको आंदोलन केले होते. यावेळी आंदोलकांना अटकाव करणाऱ्या पोलिसांवरच काही ट्रकचालकांनी हल्ला केला. यात दगडफेक करत काठ्यांनी मारहाण केली. यात चार पोलीस जखमी झाले होते. पोलिसांनी ५० दंगलखोरांना ताब्यात घेतले. चौकशी केल्यावर त्यातील ३३ जणांचा हल्ल्यात प्रत्यक्ष सहभाग असल्याचे समोर आल्यावर त्यांना अटक करण्यात आली होती. मंगळवारी या सर्व आरोपींना न्यायालयात हजर करण्यात आले. न्यायालयाने सर्वांना ५ जानेवारीपर्यंत पोलीस कोठडी सुनावली.