नवी मुंबई : ऑक्टोबर २०२४ मध्ये सिडकोने नवी मुंबई परिसरात २६ हजार घरांची लॉटरी जाहीर केली. जाहिरातीत ही घरे पंतप्रधान आवास योजनेंतर्गत असल्याचे सांगून घरांच्या किमती सर्व सामन्यांच्या आवाक्याबाहेर ठेवल्याचे चित्र पहावयास मिळत आहे. सिडकोच्या या मनमानी कारभाराविरोला विरोध करत मनसे प्रवक्ते व नवी मुंबई शहर अध्यक्ष गजानन काळे यांच्या नेतृत्त्वाखाली मंगळवारी वाशी येथे मानवी साखळी आंदोलन करण्यात आले. हजारोंच्या संख्येने सिडको सोडतधारक मानवी साखळी आंदोलनात सहभागी झाले होते.
छत्रपती शिवाजी महाराज चौक ते अरेंजा कॉर्नर असा पायी मोर्चा काढण्यात आला. नंतर अरेंजा कॉर्नर येथे सिडको सोडतधारकांनी भव्य मानवी साखळी उभी करून सिडकोचा निषेध केला. सिडकोने दर जाहीर करण्यापूर्वी १ लाख ५२ हजार अर्ज दाखल झाले असता दर जाहीर झाल्यानंतर फक्त २२ हजार अर्ज उरलेत. त्यातील पण जवळपास ६-७ हजार सोडतधारकांना घरे जबरदस्ती माथी मारली जात आहेत. सिडकोने ७०० कोटी खर्च करून ज्या मार्केटिंग कंपनीशी करार केला होता, ते पैसे घरांच्या किमती कमी करण्यासाठी वापरले असते, तर गोरगरीबांचे आशीर्वाद मिळाले असते, अशी भावना सिडको सोडतधारकांनी व्यक्त केली. त्याचप्रमाणे सिडकोने जाहिरात करताना ३२२ चौ.फुटाचे घर सांगून प्रत्यक्षात २९० चौ.फुटाचे घर देऊन सर्वसामान्य सिडको सोडतधारकांची फसवणूक केली आहे. सिडकोने या घरांचे दर ठरवताना अनेक पातळ्यांवर सर्वसामान्यांची व केंद्र सरकारची फसवणूक केल्याचा आरोप करण्यात आला. केंद्र सरकारने सप्टेंबर २०२४ मध्ये पंतप्रधान आवास योजनेची मार्गदर्शक तत्त्वे जाहीर केली आहेत.
त्यानुसार आर्थिकदृष्ट्या दुर्बल घटकांची उत्पन्न मर्यादा ३ लाखांपेक्षा कमी तर अल्प उत्पन्न गट या घटकाची मर्यादा ३ लाख ते ६ लाख असायला हवी. हे नियम नरेंद्र मोदींच्या गुजरातमधील अहमदाबादमध्ये पाळले जातात, मग नवी मुंबई याला अपवाद का? त्याचप्रमाणे विधानसभा निवडणुकीपूर्वी सिडको अध्यक्ष संजय शिरसाट यांनी आश्वासन दिले होते, की घरांच्या किमती २०% ते २५% नी कमी होतील. या घोषणेचा ही मंत्री महोदयांना विसर पडल्याचे दिसून येते. कुर्लामध्ये म्हाडा जवळपास ५०० चौ.फुटाचे घर ५० लाखाला देत असताना सिडको नवी मुंबईत ३०० चौ.फुटाचे घर ८० लाखाला का देत आहे? असा सवाल उपस्थित करत ही सर्व सामान्यांची घोर फसवणूक आहे, असा आरोप गजानन काळे यांनी सिडको प्रशासनावर केला. या मोर्चात मनसे उपशहर अध्यक्ष सविनय म्हात्रे, शहर सचिव विलास घोणे, सचिन कदम, महिला सेना शहर अध्यक्ष डॉ. आरती धुमाळ व सिडको सोडतधारक मोठ्या संख्येने उपस्थित होते.
सिडको भवनवर ‘इंजेक्शन मोर्चा’चा इशारा
पुढील निर्णय होईपर्यंत सिडकोने पैसे भरायची प्रक्रिया थांबवावी, अशी मागणी सुद्धा या आंदोलनावेळी सिडको प्रशासनाला करण्यात आली. येत्या काही दिवसांत सिडको प्रशासनाला सोडतधारकांतर्फे पोस्ट कार्ड पाठवण्याची मोहीम सुरू करणार तसेच आवश्यकता पडल्यास सिडको सोडतधारक 'जेल भरो' आंदोलन करतील, अशी माहिती गजानन काळे यांनी दिली. या मोहिमेत सिडको सोडतधारक आपल्या भावना प्रशासन व सरकारला कळवतील. तसेच येत्या काही दिवसांत जर घरांचे दर कमी नाही झाले तर सिडको भवनवर भव्य 'इंजेक्शन मोर्चा' काढण्यात येईल, अशी घोषणा गजानन काळे यांनी केली.