नवी मुंबई आंतरराष्ट्रीय विमानतळावरून प्रवास करणाऱ्या प्रवाशांसाठी हवाई कनेक्टिव्हिटी आणखी वाढली आहे. FLY91 विमान कंपनीने मंगळवारपासून (दि.०६) नवी मुंबई आंतरराष्ट्रीय विमानतळावरून आपली सेवा सुरू केली. सिंधुदुर्ग, जळगाव, गोवा आणि अगत्ती या चार ठिकाणांसाठी थेट विमानसेवा उपलब्ध करण्यात आली आहे. विशेष म्हणजे, हैदराबादहून आलेल्या FLY91च्या पहिल्या विमानाचे नवी मुंबई विमानतळावर ‘वॉटर कॅनन सॅल्यूट’ देऊन स्वागत करण्यात आले. याचा व्हिडिओही समोर आला आहे.

हिवाळी वेळापत्रकात FLY91कडून एकूण १४ ठिकाणांसाठी आठवड्याला ३५० हून अधिक उड्डाणे चालवण्याची योजना आहे. त्यामुळे नवी मुंबई विमानतळावरून प्रवाशांना आणखी शहरांसाठी थेट हवाई प्रवासाचा पर्याय मिळणार आहे.

पहिल्या विमानाचे खास स्वागत

हैदराबादहून नवी मुंबई आंतरराष्ट्रीय विमानतळावर आलेले FLY91चे पहिले विमान धावपट्टीवर उतरल्यानंतर त्याचे वॉटर कॅनन सॅल्यूटने स्वागत करण्यात आले. अग्निशमन वाहनांमधून विमानाच्या दोन्ही बाजूंनी पाण्याचे फवारे उडवून हे औपचारिक स्वागत करण्यात आले. या क्षणाचा व्हिडिओही सोशल मीडियावर समोर आला आहे.

हिवाळी वेळापत्रकासाठी वाहतूक व्यवस्था वाढवणार

दरम्यान, २५ ऑक्टोबर २०२६ ते २७ मार्च २०२७ या कालावधीतील हिवाळी वेळापत्रकाच्या पार्श्वभूमीवर नवी मुंबई विमानतळापर्यंत पोहोचण्यासाठी सार्वजनिक वाहतुकीचे पर्यायही वाढवण्यात येत आहेत.

मुंबई, नवी मुंबई, पुणे आणि मुंबई महानगर प्रदेशातील प्रवाशांसाठी बस, टॅक्सी, रिक्षा, कार रेंटल आणि एअरपोर्ट शटल असे विविध पर्याय उपलब्ध केले जाणार आहेत.

७ ऑक्टोबरपासून ई-शिवाई बस

महाराष्ट्र राज्य मार्ग परिवहन महामंडळाकडून ७ ऑक्टोबरपासून नवी मुंबई विमानतळासाठी ई-शिवाई इलेक्ट्रिक बससेवा सुरू केली जाणार आहे. पहिल्या टप्प्यात दादर, बोरिवली आणि पुणे येथून विमानतळासाठी बस धावतील.

दादर-नवी मुंबई विमानतळ बस सायन आणि अटल सेतूमार्गे धावेल. बोरिवलीहून येणारी बस छत्रपती शिवाजी महाराज आंतरराष्ट्रीय विमानतळाच्या टर्मिनल १, वांद्रे आणि अटल सेतूमार्गे नवी मुंबई विमानतळ गाठेल. पुण्याहून दररोज दोन बस चालवल्या जाणार असून, एक सकाळी आणि दुसरी दुपारी असेल. ठाणे आणि नाशिक येथूनही नोव्हेंबरच्या मध्यापर्यंत सेवा सुरू करण्याची योजना आहे.

पुण्यासाठी ४५० रुपये, बोरिवलीसाठी २१० रुपये आणि दादर पूर्वसाठी १७० रुपये भाडे निश्चित करण्यात आले आहे. १२ वर्षांखालील मुले आणि नॅशनल कॉमन मोबिलिटी कार्डद्वारे प्रवास करणाऱ्या महिलांना निम्म्या भाड्याची सवलत मिळेल.

१० ऑक्टोबरपासून ‘भारत टॅक्सी’

नवी मुंबई विमानतळावर १० ऑक्टोबरपासून ‘भारत टॅक्सी’ सेवाही सुरू होणार आहे. सुरुवातीला ४० पर्यंत वाहनांचा स्वतंत्र ताफा उपलब्ध केला जाणार आहे. याशिवाय प्रीपेड टॅक्सी आणि प्रीपेड रिक्षांची सुविधाही प्रवाशांना मिळणार आहे.

‘चलो बस’च्या माध्यमातून दररोज २१ बससेवा चालवल्या जाणार आहेत. या बस अंधेरी पूर्वेतील मरोळ, वांद्रे, दादर आणि कुलाब्यातील वर्ल्ड ट्रेड सेंटरला नवी मुंबई विमानतळाशी जोडतील. गर्दीच्या वेळेनुसार बसची संख्या वाढवण्याचेही नियोजन आहे.

NMMTच्या ७ विशेष मार्गांवर बस

नवी मुंबई महापालिका परिवहन उपक्रम अर्थात NMMTकडून विमानतळासाठी A१ ते A७ असे सात स्वतंत्र बसमार्ग चालवले जाणार आहेत. टर्मिनल १ येथून खारकोपर, तारघर, बेलापूर, नेरूळ, पनवेल, खांदेश्वर आणि एअरपोर्ट प्रोजेक्ट ऑफिस या ठिकाणांना बससेवा जोडणार आहे.

गर्दीच्या वेळेत बेलापूर आणि नेरूळसाठी दर १५ ते २० मिनिटांनी बस उपलब्ध करण्याचे नियोजन आहे. पुढील टप्प्यात वाशी आणि पनवेलसाठी आणखी कनेक्टिव्हिटी वाढवली जाणार आहे.

दोन्ही विमानतळांदरम्यान मोफत शटल

नवी मुंबई आंतरराष्ट्रीय विमानतळ आणि मुंबईतील छत्रपती शिवाजी महाराज आंतरराष्ट्रीय विमानतळादरम्यान प्रवास करणाऱ्यांसाठीही महत्त्वाची सुविधा उपलब्ध होणार आहे. दोन्ही विमानतळांना जोडणारी मोफत शटल बस दर तासाला चालवली जाणार आहे. सिटीफ्लो, आर्या आणि चलो यांच्या माध्यमातून ही सेवा दिली जाणार आहे.

नवी मुंबई विमानतळावरील एकूण जमिनीवरील वाहतूक क्षमता ४,६८९ वाहनांपर्यंत वाढवण्याचे नियोजन आहे. यामध्ये ३,७८७ ॲप-आधारित टॅक्सी, १८४ भाडेतत्त्वावरील कार, १७१ रिक्षा आणि ५४७ बसचा समावेश आहे. प्रवाशांसाठी ॲप-आधारित टॅक्सी, प्रीपेड टॅक्सी, रिक्षा, भाडेतत्त्वावरील कार आणि बस असे विविध पर्याय उपलब्ध होणार आहेत.

(इंग्रजी बातमी वाचण्यासाठी येथे क्लिक करा.)