फिलाडेल्फिया : निकोला व्लासिक आणि पीटर सुसिक यांनी केलेल्या गोलच्या जोरावर क्रोएशियाने घानाचा २-१ ने पराभव केला. या विजयासह क्रोएशिया संघाने फिफा विश्वचषकाच्या बाद फेरीत आपले स्थान निश्चित केले आहे. या सामन्यात ४० वर्षीय लुका मॉड्रिकने विश्वचषकाच्या इतिहासातील सर्वात वयस्कर खेळाडू म्हणून पास देण्याचा विक्रम नोंदवला.
सामन्याच्या ३१ व्या मिनिटाला पीटर सुसिकने पेनल्टी बॉक्सच्या बाहेरून गोल करत क्रोएशियाला १-० अशी आघाडी मिळवून दिली. मात्र, ७३ व्या मिनिटाला घानाच्या डेरिक लुकासेनने गोल करत सामना १-१ असा बरोबरीत आणला. त्यानंतर ८३ व्या मिनिटाला लुका मॉड्रिकच्या कॉर्नर किकवर निकोला व्लासिकने हेडरद्वारे गोल करत क्रोएशियाला २-१ ने विजय मिळवून दिला.
क्रोएशियाने या विजयामुळे एल गटात इंग्लंडपाठोपाठ दुसरे स्थान प्राप्त केले. घानाने गटात ४ गुणांसह तिसरे स्थान प्राप्त करून बाद फेरीतील स्थान निश्चित केले. याआधी घानाने २०१० नंतर पहिल्यांदाच बाद फेरी गाठली आहे. सामन्यांनंतर घानाचे प्रशिक्षक कार्लोस क्विरोज यांनी सांगितले की, “बचावफळीतील चुकांमुळे घानाने हा सामना गमावला.” क्रोएशियाचा बाद फेरीतील पुढील सामना ३ जुलै रोजी पोर्तुगाल यांच्याशी होणार आहे. सामन्यादरम्यान मॉड्रिकच्या कामगिरीचे सुसिक आणि व्हासिक या दोघांनीही कौतुक केले असून, तो आपल्या संघाचा खरा मार्गदर्शक असल्याचे म्हटले आहे.