कोलकाता : शांत स्वभावाच्या सुनीन नरिनने (५६ चेंडूंत १०९ धावा) मंगळवारी कोलकाताच्या ईडन गार्डन्सवर शतकी धुमाकूळ घातला. त्यामुळे कोलकाता नाइट रायडर्सने आयपीएलमध्ये राजस्थान रॉयल्सविरुद्ध २० षटकांत ६ बाद २२३ धावांचा डोंगर उभारला.

संजू सॅमसनने नाणेफेक जिंकून प्रथम गोलंदाजी स्वीकारली. फिल सॉल्ट १३ चेंडूंत अवघ्या १० धावांवर बाद झाला, त्यावेळी हा निर्णय योग्य ठरणार, असेही वाटले. मात्र त्यानंतर ३५ वर्षीय नरिनने आक्रमक रूप धारण केले. आपल्या गोलंदाजीसाठी प्रामुख्याने ओळखल्या जाणाऱ्या नरिनने या हंगामात सलामीवीर म्हणून आधीच एक अर्धशतक झळकावले होते. मंगळवारी त्याने १३ चौकार व ६ षटकारांसह शतकी नजराणा पेश केला. मुंबईकर अंक्रिश रघुवंशीसह (३०) नरिनने दुसऱ्या विकेटसाठी ८५ धावांची भागीदारी रचली.

रघुवंशी व कर्णधार श्रेयस अय्यर (११) बाद झाल्यावर धोकादायक आंद्रे रसेलसह नरिनची जोडी जमली. या वेस्ट इंडिजच्या खेळाडूंनी चौथ्या विकेटसाठी १९ चेंडूंतच ५१ धावांची भागीदारी रचली. १६व्या षटकात चहलला चौकार लगावून नरिनने ४९ चेंडूंतच शतकाची वेस ओलांडली. रसेलने १३ धावा केल्या. हे दोघे बाद झाल्यावर रिंकू सिंग (नाबाद २०) व वेंकटेश अय्यरने (८) कोलकाताला दोनशे धावांचा पल्ला गाठून दिला. कुलदीप सेन व आवेश खान यांनी प्रत्येकी दोन बळी मिळवले.