पुद्दुचेरी : भारत-अ संघाला ऑस्ट्रेलिया-अ संघाविरुद्धच्या दुसऱ्या एकदिवसीय सामन्यात ६९ धावांनी पराभव पत्करावा लागला. त्यामुळे त्यांच्यावर मालिका पराभवाची नामुष्की ओढवली. ऑस्ट्रेलियाने तीन लढतींच्या मालिकेत २-० अशी विजयी आघाडी घेतली.
प्रथम फलंदाजी करताना ऑस्ट्रेलिया-अ संघाने ४९.५ षटकांत २७५ धावांपर्यंत मजल मारली. सॅम कोन्स्टास (६७) व जोश फिलिपे (५८) यांनी अर्धशतके साकारली. अर्शद खानने ३, तर यश ठाकूरने २ बळी मिळवले. मात्र लक्ष्याचा पाठलाग करताना भारत-अ संघ ४५.२ षटकांत २०६ धावांत गारद झाला.
कर्णधार ऋतुराज गायकवाड (१२), देवदत्त पडिक्कल (१), साई सुदर्शन (१३) यांनी निराशा केली. रजत पाटीदारने ६७ धावांची एकाकी झुंज दिली. तसेच अनुकूल रॉय (नाबाद ३४) व विपराज निगम (२३) यांनी प्रतिकार केला. मात्र सुरुवातीलाच ४ बाद ५९ अशी अवस्था झाल्यानंतर भारतीय संघाने ठराविक अंतराने बळी गमावले. स्पेन्सर जॉन्सनने ३ गडी बाद केले.
उभय संघांतील कसोटी मालिकेत भारत-अ संघाने १-० असे यश मिळवले होते. मात्र एकदिवसीय मालिकेत भारताने दोन्ही लढतींत निराशा केली.