नवी दिल्ली: अनुभवी फलंदाज के. एल. राहुलची आगामी वेस्ट इंडिजविरुद्धच्या तीन सामन्यांच्या वनडे मालिकेसाठी भारतीय संघाचा उपकर्णधार म्हणून निवड होण्याची शक्यता आहे. शुभमन गिलच्या नेतृत्वाखाली भारत २७सप्टेंबरपासून या मालिकेला सुरुवात करणार आहे.
मालिकेतील पहिला सामना थिरुवनंतपुरम येथे होणार असून, त्यानंतर ३० सप्टेंबरला गुवाहाटी आणि ३ ऑक्टोबरला मुल्लानपूर येथे अनुक्रमे दुसरा आणि तिसरा सामना खेळवण्यात येईल.
वेस्ट इंडिजविरुद्धची वनडे मालिका आणि इराणी चषकासाठी भारतीय संघाची निवड १६ सप्टेंबरला होणार आहे. त्याच्या आदल्या दिवशी अफगाणिस्तानविरुद्ध दुसरा टी-२० सामना होणार असून, निवड समितीचे अध्यक्ष अजित आगरकर या सामन्याला उपस्थित राहणार आहेत.
विशेष म्हणजे, आगरकर यांच्या सध्याच्या कराराच्या कालावधीतील ही शेवटची निवड बैठक असेल. त्यांचा विद्यमान करार ४ ऑक्टोबरला संपणार आहे. त्यांना आणखी एका वर्षाची मुदतवाढ मिळू शकते; मात्र आगरकर यांच्या भवितव्याबाबत बीसीसीआयने अद्याप कोणतीही अधिकृत माहिती दिलेली नाही.
"पंत आणि जुरेल यांच्यात निवड करायची आहे. अर्थात, मुख्य प्रशिक्षक आणि कर्णधाराचे मतही मतही महत्त्वाचे ठरेल," असे निवड प्रक्रियेची माहिती असलेल्या बीसीसीआयच्या एका सूत्राने सांगितले.
पंतची भारतीय संघात दुसरा यष्टिरक्षक म्हणून निवड झाली नाही, तर तो इराणी चषकात जम्मू-काश्मीरविरुद्ध रेस्ट ऑफ इंडियाचे नेतृत्व करेल, अशी शक्यता आहे. मात्र पंतची भारतीय संघात निवड झाल्यास ध्रुव जुरेल रेस्ट ऑफ इंडियाचे नेतृत्व करू शकतो. जुरेलने अलीकडेच श्रीलंका दौऱ्यावर इंडिया एचे नेतृत्व केले होते.
भारताच्या वेगवान गोलंदाजी विभागात मात्र सध्या पर्याय निश्चित दिसत आहेत. मोहम्मद सिराज, प्रसिद्ध कृष्णा, गुरनूर ब्रार आणि प्रिन्स यादव हे सर्वजण तंदुरुस्त असून निवडीसाठी उपलब्ध आहेत. श्रेयस अय्यरच्या अनुपस्थितीत ऋतुराज गायकवाडचीही संघात निवड होण्याची शक्यता आहे.
श्रेयस अय्यरची अनुपस्थिती?
वेस्ट इंडिजविरुद्धच्या वनडे मालिकेदरम्यान आशियाई क्रीडा स्पर्धा सुरू असल्याने नियमित वनडे उपकर्णधार श्रेयस अय्यर उपलब्ध राहणार नाही. तो जपानमध्ये आशियाई क्रीडा स्पर्धेसाठी भारतीय टी-२० संघाचे नेतृत्व करणार आहे. त्यामुळे राहुलकडे वनडे संघाच्या उपकर्णधारपदाची जबाबदारी सोपवली जाण्याची शक्यता आहे. ईशान किशनही आशियाई क्रीडा स्पर्धेच्या तयारीसाठी उपलब्ध नसल्याने राहुलच्या मागे दुसरा यष्टिरक्षक कोण असणार, यावर निवड समितीसमोर चर्चा होणार आहे. या जागेसाठी ऋषभ पंत आणि ध्रुव जुरेल यांच्यात मुख्य स्पर्धा आहे.
▶ हार्दिक पंड्याच्या फिटनेसकडे लक्ष
हार्दिक पंड्या पूर्णपणे तंदुरुस्त असल्याचे स्पष्ट झाले नाही, तर वनडे संघासाठी वेगवान गोलंदाजी करणाऱ्या अष्टपैलू खेळाडूची निवड करणे निवड समितीसाठी आव्हानात्मक ठरू शकते. बीसीसीआयच्या सेंटर ऑफ एक्सलन्समधील सूत्रांनुसार, इंडिया ए संघात निवड झालेला हार्दिक २० सप्टेंबरपासून स्पर्धात्मक मर्यादित षटकांच्या क्रिकेटसाठी उपलब्ध होण्याची शक्यता आहे. "निवड समितीने ६ ऑक्टोबरपासून पुद्दुचेरी येथे होणाऱ्या इंडिया एच्या वनडे सामन्यांसाठी हार्दिकची निवड केली आहे. मात्र वेस्ट इंडिजविरुद्धची वनडे मालिका ३ ऑक्टोबरला संपणार आहे. त्यामुळे हार्दिकची वेस्ट इंडिजविरुद्धच्या वनडे मालिकेसाठी निवड होते का, हे पाहणे महत्त्वाचे ठरेल," असे सूत्राने सांगितले.
▶ अनेक राखीव खेळाडू दुखापतीमुळे बाहेर
अनेक राखीव खेळाडू दुखापतग्रस्त असल्याने निवड समितीसमोरील अडचणी वाढल्या आहेत. विशेषतः अष्टपैलू खेळाडूंचे पर्याय मर्यादित झाले आहेत. सध्या दुखापतग्रस्त खेळाडूंच्या यादीत हर्ष दुबे, सूर्यांश शेडगे, मोहसीन खान, व्यंकटेश अय्यर, हर्षित राणा आणि शाहबाज अहमद यांचा समावेश आहे. त्यामुळे हे खेळाडू वरिष्ठ संघ, इंडिया ए किंवा इराणी चषकासाठी निवडीसाठी उपलब्ध नाहीत. हे सर्व खेळाडू बेंगळुरू येथील सेंटर ऑफ एक्सलन्समध्ये पुनर्वसन प्रक्रियेतून जाणार आहेत.
▶ इराणी चषकासाठी सर्फराझ, सांगवान
ऑस्ट्रेलिया-अ संघाविरुद्धच्या भारत-अ कसोटी संघात निवड न झालेला मुंबईचा अनुभवी फलंदाज सर्फराझ खान सध्या शेष भारत संघात निवडला जाण्याची शक्यता आहे. रणजी करंडकात सर्वाधिक धावा करणाऱ्या पहिल्या तीन फलंदाजांमध्ये स्थान मिळवणारे दिल्लीचे युवा फलंदाज सनत सांगवान आणि आयुष दोसजा यांनाही शेष भारत संघात स्थान मिळण्याची अपेक्षा आहे. रविचंद्रन स्मरणचाही या संघात समावेश होण्याची शक्यता आहे.