पॅरिस : दोन वेळा ऑलिम्पिक पदक विजेती पी. व्ही. सिंधू हिने फ्रान्स येथे सुरू असलेल्या फ्रेंच ओपन सुपर ७५० बॅडमिंटन स्पर्धेच्या महिला एकेरीच्या उपांत्य फेरीत सरळ गेममध्ये विजय मिळवत दणदणीत प्रवेश केला आहे. मात्र, दुसरीकडे शानदार फॉर्ममध्ये असलेल्या आस्मिता चालिहा हिची विजयी दौड उपांत्यपूर्व फेरीतच संपुष्टात आली.
माजी विश्वविजेती सिंधूने ९ लाख ५० हजार डॉलर संपत्तीच्या या स्पर्धेच्या उपांत्यपूर्व फेरीत चिनी ताईपेईच्या चिउ पिन-चियान हिचा ३९ मिनिटांत २१-१३, २१-१४ असा पराभव करत पूर्ण नियंत्रण राखले. दरम्यान, प्री-क्वार्टर फायनलमध्ये जपानच्या तीन वेळा विश्वविजेती असलेल्या अकाने यामागुची हिचा पराभव करणाऱ्या २७ वर्षीय आस्मिता चालिहा हिचे आव्हान संपुष्टात आले. जागतिक क्रमवारीत ३६ व्या स्थानी असलेल्या भारतीय खेळाडूला जपानच्या माजी विश्वविजेती आणि ऑलिम्पिक कांस्य पदक विजेती नोजोमी ओकुहारा हिच्याकडून १०-२१, २१-१७, १६-२१ असा संघर्षपूर्ण पराभव पत्करावा लागला.
या विजयासह सिंधू स्पर्धेत कायम राहिलेली भारताची एकमेव खेळाडू ठरली असून, उपांत्य फेरीत तिची गाठ जपानच्या हिना अकेची हिच्याशी पडेल. पिन-चियानविरुद्धचा विजय जरी सोपा वाटला असला, तरी जागतिक क्रमवारीत ११ व्या स्थानी असलेल्या सिंधूने पहिल्या फेरीत थायलंडची जागतिक क्रमवारीत २६ व्या स्थानी असलेली सुपानिडा काटेथोंग हिच्याविरुद्ध संघर्ष केला होता.
पहिल्या फेरीतील अनुभवाबद्दल सिंधू म्हणाली की, आपण पहिल्या फेरीत योग्य तो धडा घेतला असून, आघाडी घेतल्यानंतर आपण अधिक सतर्क राहिल्याचे तिने स्पष्ट केले. मागील आठवड्यात डेन्मार्क ओपनमध्ये जर्मनीच्या लोवर-रँक्ड यवोन्ने ली हिच्याकडून पराभव पत्करावा लागलेल्या सिंधूने आतापर्यंत कधीही फ्रेंच ओपनचे विजेतेपद जिंकलेले नाही आणि ती यंदा तो दुष्काळ संपवण्यास उत्सुक आहे. फ्रेंच ओपन जिंकणे मोलाचे ठरेल आणि यासाठी आपण पूर्ण ताकदीने पुनरागमन करू, असा विश्वास सिंधूने व्यक्त केला.
भारताचे आयुष शेट्टी आणि तन्वी शर्मा आपापल्या गटांतून उपउपांत्यपूर्व फेरीत पराभव पत्करावा लागला. भारतीय खेळाडूंपैकी सर्वप्रथम कोर्टवर उतरलेल्या तन्वी शर्माला जागतिक क्रमवारीत अव्वल स्थानी असलेल्या आणि दक्षिण कोरियाच्या अग्रमानांकित आन से यंगसमोर टिकाव धरता आला नाही.