नवी दिल्ली : इंडियन प्रीमियर लीग म्हणजेच आयपीएलच्या १७व्या पर्वाचे उर्वरित वेळापत्रक सोमवारी जाहीर करण्यात आले. यंदा चेन्नईतील एम. ए. चिदंबरम (चेपॉक) स्टेडियमवर २६ मे रोजी आयपीएलचा अंतिम सामना रंगणार असून अहमदाबाद येथील नरेंद्र मोदी स्टेडियमवर ‘बाद फेरी’च्या (प्ले-ऑफ) दोन लढती खेळवण्यात येतील. बीसीसीआयच्या नव्या नियमानुसार आता आयपीएलचा पहिला व अंतिम सामना हा गतविजेत्यांच्या मैदानावर खेळवण्यात येतो. त्यामुळे २०२३च्या विजेत्या चेन्नईला हा मान मिळाला आहे.
देशभरात होणाऱ्या लोकसभा निवडणुकीच्या पार्श्वभूमीवर बीसीसीआयने २२ फेब्रुवारी रोजी फक्त पहिल्या २१ सामन्यांचे वेळापत्रक जाहीर केले होते. त्यानंतर काही दिवसांपूर्वीच निवडणुकांच्या तारखा समोर आल्यावर आयपीएलचे उर्वरित वेळापत्रक कधी जाहीर होणार, याकडे सर्वांचे लक्ष लागून होते. आता ८ एप्रिल ते २६ मेपर्यंतचे उर्वरित वेळापत्रक बीसीसीआयने घोषित केले आहे. यापूर्वी सलग दोन हंगामांमध्ये अहमदाबादला अंतिम फेरी झाली होती. तसेच एकदिवसीय विश्वचषकाचा अंतिम सामनाही अहमदाबादलाच झाला होता. त्यामुळे काही चाहत्यांनी नाराजीसुद्धा प्रकट केली होती. अखेर यंदा मात्र चेन्नईला अंतिम सामन्याचे आयोजन करण्याची संधी देण्यात आली आहे. कोणत्या राज्यात कधी निवडणुका आहेत, हे सर्व लक्षात ठेवूनच आयपीएलचे वेळापत्रक जाहीर करण्यात आले, असे बीसीसीआयचे सचिव जय शहा यांनी सांगितले.
देशांतील १० शहरांत ७० साखळी सामने खेळवण्यात येतील. त्यानंतर बाद फेरीच्या चार असे एकूण ७४ सामने यंदाच्या आयपीएलमध्ये रंगतील. यापूर्वी २०१९मध्येसुद्धा निवडणुका असताना संपूर्ण आयपीएल भारतात आयोजित करण्यात आली होती. १९ मेपर्यंत साखळी सामने संपतील. २१ मे रोजी क्वालिफायर-१, तर २२ मे रोजी एलिमिनेटर लढत होणार असून हे सामने अहमदाबादला खेळवण्यात येतील. त्यानंतर क्वालिफायर-२ व अंतिम सामना चेपॉकवर रंगणार आहे.
गटवारीविषयी महत्त्वाचे
यंदाही १० संघांची दोन गटांत विभागणी करण्यात आली आहे.
एका संघाला आपल्या गटातील अन्य चार संघांविरुद्ध प्रत्येकी दोन लढती खेळायच्या आहेत.
अन्य गटातील प्रतिस्पर्ध्यांशी ते प्रत्येकी एकच सामना खेळतील.
मात्र त्यांच्या समोरील ओळीत असलेल्या संघाशी ते दोन सामने खेळतील. (उदाहरण मुंबई-बंगळुरू हे वेगवेगळ्या गटांत असले तरी समोरच्या ओळीत असल्याने त्यांच्यात दोन लढती होतील.)
वानखेडे स्टेडियमवर होणारे मुंबई इंडियन्सचे सामने
१ एप्रिल - मुंबई - वि. राजस्थान
७ एप्रिल - मुंबई - वि. दिल्ली
११ - एप्रिल -मुंबई - वि. बंगळुरू
१४ - एप्रिल - मुंबई - वि. चेन्नई
३ मे - मुंबई - वि. कोलकाता
६ मे - मुंबई - वि. हैदराबाद
१७ मे - मुंबई - वि. लखनऊ