लिओनेल मेसी, किलियान एम्बापे आणि नेयमार या अनुभवी आक्रमणपटूंच्या त्रिकुटाने केलेल्या प्रत्येकी एका गोलच्या बळावर पॅरिस सेंट-जर्मेन (पीएसजी) संघाने चॅम्पियन्स लीग फुटबॉलमध्ये मकाबी हैफा संघाला ३-१ अशी धूळ चारली.
टेरॉन चेरीने २४व्या मिनिटाला मकाबी संघासाठी धक्कादायक गोल नोंदवल्यामुळे पीएसजीवर पराभवाचे ढग निर्माण झाले होते; मात्र मेसीने ३७व्या मिनिटाला गोल झळकावून पीएसजीला मध्यंतरापूर्वी १-१ अशी बरोबरी साधून दिली. त्यानंतर दुसऱ्या सत्रात एम्बापे आणि नेयमार यांनी अनुक्रमे ६९ आणि ८८ मिनिटाला गोल नोंदवून पीएसजीच्या विजयावर शिक्कामोर्तब केले.
बार्सिलोना पराभूत; माद्रिदचा विजय
चॅम्पियन्स लीगमधील अन्य साखळी सामन्यात बायर्न म्युनिकने बार्सिलोनाला २-० असे पराभूत केले, तर रेयाल माद्रिदने आरबी लेपझिगवर २-० अशी मात केली. बायर्नकडून लुकास हर्नांडेझ आणि लेरॉय साने यांनी गोल नोंदवले. बार्सिलोनाकडून खेळणाऱ्या रॉबर्ट लेवांडोवस्कीला आपल्या माजी संघाविरुद्ध (बायर्न) छाप पाडता आली नाही.